Vol-4 Issue-1

Kristian Mission

  Smt. Rinje S. Sangma 

Bombay Teen Challange, MUMBA

“ Indide jeko bebera·kuja, uo uamang maidake bi·gen?  Aro jeni gimin knakuja, uo uamang maidake bebera·gen? Aro aganprakgipa griode, uamang maidake knagen? Aro uamangko watatjaode, uamang maidake aganprakgen ? … (Romrangna 10:14,15).  Kosako janapgipa Isolni Kattarangan pilak mondolirangkon Mission-ni  kamna dal·begipa ra·biani ong·a. Mingbri Isolni Nama Kattarango Jisu Kristo sakantikon re·ange aganprakchina ge·etaha. Indiba ia kosako janapgipa Uni Kattarangode  Isol mondoli ge·antikon Mission-ni kamo bak ra·skachina ra·bianiko on·skaaha. Mission-ni miksonganiara mai?  Mission Kattara Latin katta ‘mitto’ ingipa ong·a jeni miksonganian ‘watata’ ine aganani ong·a. Oxford dictionaryoniko nigenchimode Mission-ni miksonganiara maiba kam ba miksonganio watatgipa mande ba dol ine seaniko nikgen. Jisu Kristoni sninggiparangko ja·mano ‘Watatarang’ ine inaha, jeni miksonganian kosako janapgipa katta baksa apsan ong·a. Uanigimin kan·dike agangenchimode Mission kattani chong·motgipa miksonganiara dingtangmancha maiba kamko chu·sokatna watatgipa mande inani ong·a. Kristian Mission ine aganon, Kristoni Nama Kattako aganprakani, Uni songnokko rikani aro gimagipa janggirangko ba jatrangko Isolona rimbapil·ani ong·a.

                         MONDOLIKO MAI MIKSONGANIO ONG·ATAHA ?

  Isolara mondoliko an·tangna rikaha. Unigimin mondoliara Isolni ka·tongo ong·a. Chong·motgipa mondoliko ong·atani miksonganirangara :- 1. A·gilsako Isolko olakkina aro Una rasong on·na. 2. Mondoliko ong·ataniara Isolko olakkie mang mang dongainade ong·ja ; indiba  Isolni gimin sakki on·naba uko ong·ataha. Isolni gimin sakki on·nade an·ching Isolni gimin, Uni Kattarangni gimin aro Uni skani gimin u·ichengna nanga. Isolni gimin name u·ichengjaode Una name sakkiko on·na man·ja. Isolna sakki on·aniara an·chingni ku·sik mangmangchi sakki on·anikode miksongja ; indiba an·chingni namgipa kamrang aro namgipa janggi tangmesokanichi sakki on·anikosa miksonga. Gitrang 96:3-o Isol Isreal jatrangko Jihovani gimin jatrangna sakki on·china ge·etaha. Unigimin sakki on·aniara mondolini namen mongsonggipa dakna nanggni kam ong·a. Ian mondolini gelna man·gijagipa kamba ong·a.  An·chingni Isolara an·tangan Mission-ni kamko ka·gipa ong·a. Unigimin mondolini dal·batsranggipa skanggipa dakna nanganiara Mission-ni kaman ong·a. An·chingni mondolirangara maikai Mission-o bak ra·gen ? Mission-o bak ra·ani miksonganiara Mision-ni kamna ja·ku ga·e gimaagipa janggirangko Isolona rimbapilna kam ka·anian ong·a. Minggittam dake an·ching Mission-o bak ra·na man·a :- 1. Isolo bi·anichi.

     2. Tangka-paisarangko dakchakanichi aro

    3. An·tangan Mission a·baona re·ange kam ka·anichi ba an·tangni palo sakgipinrangko watatskaanichi.

        Q.  Mondolirang maina Mission-o bak ra·na nangchongmota?

   1. Isol gipinko jakkalna man·ja.

   2. Kristianrang mangmangsan iako chu·sokatna man·aia, gipin toromrangde

      man·ja.

  3. Ian bakbak dakna nanggipa kam ong·a.

  4. A·gilsako bang·a manderangan Kristoko u·ina nangkuenga.

                                       MONDOLINI MISSION-NI KAMKO KA.NA TARISOANI:

 Mondoliara Mission-ni kamko ka·genma ka·jawa uko baseani ong·ja. Ian mondolini namen mongsonggipa dakna nangchongmotgipa kam ong·a. Unigimin mondoli ge·antian Mission-ni kamko ka·na tarina nanga. Mondolirangko maikai tarigen?  1. Mission-ni gimin skie on·na nanga :- Ian namen mongsonggipa mondolini dakna nangchongmotgipa kam ong·a. Mondolio Mission-ni gimin skie on·a dongjaode, ua mondoli gisikni gita dal·rorona man·ja ba tanggipa mondoli ong·na man·ja. 

2. Pamong/Dilgiparang :- Pamong aro dilgiparangni kamrangara giljako nirokna, gilja ka·dilna aro bia ka·e on·na mang mang ong·aija ; indiba giljani bebera·giparangko gimaagipa janggirangko Kristoona rimbana didina nanga. Unigimin Pamong aro Dilgiparang an·tangtangan Mission-ni kamna gisiko nanggipa ong·na nanga.

 3. Nisan done kam ka·ani :- Giljani me·chikma dol aro chadambe dolrangko Mission-ni kamna didianiko on·na nanga. Iako dakengon mondoli nisanko done Mission-ni kamko ka·chakatna nanga.

 4. Mision programmeko ong·atani :- Mondoli Mission programme jekai Mission Sunday, Mission awareness aro Mission Seminar-rangko ong·atrongna nanga.

 5. Bilko ganani :- Mondolirang Mission-ni kamko ka·nade Isolni Katta Watata 1:8-o agangipa gita  Gisik Rongtalgipani bilchi ganatako man·chengna nanga.

6. Mission a·bani gimin u·iatani :- Mondolini pamong aro dilgiparang giljani bebera·giparangna Mission-ni kam aro Mission a·bani gimin u·iataniko dakrongna nanga.

MING -10 CHU.SOKANI RAMARANG

                                                                   

                                                                                                       Smt. Binaroy A. Sangma,

                                                                            Nazing Bazar,

1. Jegita neng·nikaniko man·oba kakketo re·rurabo.                                                                 

( Ian nang·ko an·tango ka·dongchakna dakchakgen aro gipinrangba nang·o  ka·dongchake nang·ko mande ra·gen ).

2. Pilakon jaksrambo.

 ( Nang·ni somoiko aro changa-sapaniko gipinrangna dakchakna jakkalbo ).

3. Nang·ni namnikgipa aro nangnikgipa kamko rake ka·bo.

 ( Na·a nang·ni chu·sokaniko aro kamni biteko nikgen ).

4. Na·a maikoba dakanio chu·sokjaoba gital dake a·bachengtaibo.

 ( Salprakan namgipa aro gitalgipa sal ong·a )

5. Namgipa ripengrangko basebo.

 ( Ian janggi tanganio chu·sokna mongsonggipa dakna nangani ong·a )

6. Nang·na saobarang dosiko dakoba uamangna ka·sabo.

 ( Uamang nang·ko mikchepnaba donga )

7. Gipinrang baksa tom·tome janggi tangbo.

 ( Kajia golmal-ara nang·ni bilko aro miksonganiko gimaata ).

8. Isol nang·na ka·saa ine bebera·bo.

 ( Manderang nang·ko galchipoba Isol nang·na ka·saa ).

9. Pangnan Isolo bi·rongbo.

 ( Isolna kakket janggi tangbo. Ua nang·ni chanchianirangko aro ka·tongko u·ia ).

10. Nang·ni janggi tanganina Isolni daksoaniko u·ibo.

 ( Ua nang·na nambatsrangako daksoaha ).

Git-ko segipa mandeni janggi tangani

                                                                                                           (Ma. Lushbina  R.  Marak)

                                         1. NAMBEJOK ANG’ JANGGI

  “ Isol an·chingni katnapram aro bilakani ong·a, Duk ong·an salo man·ninggipa dakchakani”                  (Gitrang 46:1).

                            1.  Tom·tom ang’ ramao chiring gita jokon,

                                 Duk chipakkore gitaon ;

                                  Angna jeba dong skianisan Nang·ni

                                  Nambejok nambejok, ang’ janggi.

                                           ( Ring·taitaiani )

                                  Nambejok ang’ janggi,

                                  Nambejok, nambejok, ang’ janggi.

                              

                             2. Satan duk on·oba, majogenoba,

                                 Ka·donge donggen unoba ;

                                 Kristo ang’ bilgrianirang u·itoka,

                                 An·chitang on·jok ang’ janggina.

                              

                              3.  Ang’ pagipan ang’ gisikna ka·srokani,

                                   P’lak pap ka·giminrang angni ;

                                   Jrengjok datkapman·on chisolmung Uni,

                                    Mitelbo nang’ Gitel ang’ janggi.

                                4. Indiba Gitel Nang’ re·baona sengna,

                                    Gopramja salgisa chingna ;

                                    Sa·gren’ ja·birang, Oh ku·rang Gitelni,

                                    Ka·dongna, neng·takna ang’ janggi.

                

         Ia nambegipa git-kora Chicago Presbyterian mondolini ramramgipa mande Horatio G. Spafford se·aha. Ua 1828 bilsini October jani 20 tariko New York songjinmani North Troy biapo atchiaha. Ua chadambe mande ong·oba Spafford Chicago songjinmao dingtang dingtang kamrangko ka·e chu·sokgipa ong·aha. Ua pilak daka rikanirango chu·sokgipa ong·e, kristianrangni dingtang dingtang kamrangoba dakchakpaaha. Ua D. L. Moody aro ua jolo donggipa Nama Kattarangko gipatgipa dilgiparang baksa nangrime kamko ka·aha. Uni janggi tangani gimin George Stebbins indake agana, “ ua saksa toromni gitrangko bikotna changgipa, namen gisik seng·begipa, toromna gisiko nanggipa aro Isolni Kattarangko poraina bimchipgipa ong·a. 1871 bilsio Chicago songjinmako wa·al kamna adita jarangna skang, ua Lake Michigan-ni braramo kam ka·e bang·a tangkarangko man·ahachim ; indiba ua a·sel ong·anio pilakan nosto ka·aniko man·aha. Ua uni jikgipa aro sak 4 demechikrang baksa gipin biapchi re·ange neng·takna Moody aro Sankey-ni Great Britaino Isolna dangdike on·anio dakchakpana 1873 bilsini November jao Spafford  uni nokdangni manderang baksa jahaso songrena miksongaha. Ua uni nokdangni manderang baksa re·angna dakon, uni businessni kam rang·gitik dongchangna nangahani gimin uamang baksa re·angna man·jaha. Unigimin ua an·tangde Chicago-o dongrike uni jikgipa aro demechik sakbriko  S.S Ville du Havre jahaso watatsoaha. Ua salgipino re·angskagen ine chanchie dongahachim. Uni jikdrangni songre·anggipa jahas November jani 22 tariko Lochearn English jahas baksa nangtinggrike minit 12 na chio napsrimaha. Adita salrangni ja·mano jahaso tange jokgiparang Cardiff-o neng·takaha. Spaffordni jikgipa segipana anga saksa mang mang jokaiaha ine koborko on·ataha. Adita salrangni ja·mano Spafford ua biapona sokbae duko ga·akenggipa uni jikgipako grongeaha. Uni demechik sakbrini chio sripe sigipa biapko nie Spafford uni mikrononi mikchi joksolsole penko ra·e “duk chipakkore gitaon” ine sena a·bachengaha. Mandeni gita chanchigenchimode, Horatio Spaffordna ua salode namen aganna ampilgijagipa duk sokahachim, indiomangba ua indakgipa dukni aramrang uko simdapgenchimoba , ‘Nambejok ang’ janggi’  ine aganna man·aha aro ua biapon ua gitko seaha. 1881 bilsio Spaffordni Rongtalgipa a·songo dongkamna miksongani chu·sokaha. Uni jikgipa aro sakgni chadambe demechikrang aro adita sak ripengrang baksa Chicago songjinmako wate uamang Jeruslemo dongkamaha. Ua biapo uamang American Colonyko a·bachengate sagipa aro galchipako man·gipa manderangna dangdike on·aha. Indake Horatio Jerusalemo bilsi 8 dongani ja·mano uni bilsi 60 ong·on  siaha, indiba tangrikgiparang ua ministryko ka·angkuaha.

                                            

2. NANG’ SEPANG ANG ‘ ISOL

                    “ Isolni sepangbo, unon ua na·simangni sepanggen” Jacob 4:8.

                            

                             1. Nang’ sepang ang’ Isol

                                 Nang·ni sepang ;

                                 Nang’ sepangatgipa

                                Chisoloba,

                                 Indiba ring·kugen

                                 Nang·sepang ang’Isol     2

                                 Nang·ni sepang.

                            

                             2. Unon rama nachong,

                                 Salgin’ jang·ki ;

                                Jeko na·a on·a,

                                Sa·gre ong·a,

                                Angko jakjipchina,

                                Nang’ sepang ang’ Isol,    2

                                Nang·ni sepang.

                             

                              3. Ba katchaani grangchi

                                 Salgi chapchap,

                                 Sal, ja, aski bate,

                                 Bildooba,

                                 Unoba ring·kugen,

                                 Nang’ sepang ang’ Isol,    2

                                 Nang·ni sepang“

       Nang’ sepang ang’ Isol gitan me·chikrangni tarigipa gitrangni gisepo nambatsranggipa ong·a ine gitrangko tarigipa manderang agana. Sarah Flower Adams Englandni Harlow minggipa biapo 1805 bilsini February 22 tariko atchiaha. Ua bilsi 43 ong·on siaha. Uni kan·dikgipa janggi tanganio, Sarah Adams gipinrangna gamchatgipa ong·e janggi tangaha. Ua Londono stageo dakmesokanio Lady MacBeth dake dakrongachim. Uko uni lekka sena gisiko nangani gimin bang·a manderang u·iaha. 1834 bilsio ua Civil engineer John Brydges Adams-ko bia ka·e, Sarahni sina skang bilsi 14 na Londono dongaha. Sarahni changa sapani, nitoani, gun gnangani aro namgipa dakbewalrangan uko u·igipa sakanti manderangna namnikaniko ra·baaha. “ Nang’ sepang ang’ Isol “ gitko 1841 bilsio  nakatgipa gitalgipa git ki·tapo chappa ka·ataha. Ia gitara ring·ani git aro Londono donggipa Fox Unitariano mande jinmani tom·anio ringronggipa git ong·aha. Bilsi gittamni ja·mano 1844 bilsio ia gitko Americao ring·chengaha. Indiba ia git bilsi 12 nade name mingsingjaha. Ja·mano ia gitni sulko Lowell Mason-ni bikotosa  mingsingna a·bachengbaaha. Lowell Mason jekon Americani mondolini aro skul music-ni pagipa ine biming dona, ua bang·a namnamgipa gitrangko tariaha.    Ia gitko ring·anio bang·a gisiko nangatgipa dingtang dingtang ong·a obostarang baksa  nangrimani gnang. 1871 bilsio dal·gipa theologian sakgittam, Professor Hitchcock, Smith aro Park Palestine a·songko re·pakangmitingo ia gitni sulchi ring·a gitko knaaha. Uamang sambaona re·ange nion, sak 50 Syrian skul bi·sarangni bol ja·pango chadengdule “Nang’ sepang ang’ Isol”  gitko Arabic ku·sikchi ring·ako kna·e uamang sakgittaman aiao inmantokaha. Professor Hitchcock aganaha, angni janggi tanganio git ring·anirangko knagiminna bate ia Syrian bi·sarangni kristian gitko ring·anian angni gisiko nangatbataha aro angni ka·tongko matate angko mikchi ong·atpilaha. 1889 bilsini May jani 21 tariko Johnstown songjinmako chi dubiaha aro  rel bolsa ua  chio napsrimaha. Ia obostarang ong·engon, Eastern a·songo misssionaryni kamko ka·na re·bagipa saksa nomil ua a·sel ong·anio ga·akgipa manderangna ka·sariri kattarangko agane uamangna bi·chakaha aro “Nang’ sepang ang Isol”  gitko ring·e uamangna ka·sachake uamang baksa duk chakrimpa·aha. Ua ia gitko ring·mitingo Isolni un’ baksa donganiko u·ie uamangna dangdike on·na sikaha. Ia gitko bang·a  a·gilsakni dal·dalgipa dilgiparangba ring·na namnika. So·otako man·gipa president, William McKindley agana, “ ian angni namnikbatgipa git ong·a aro anga sina skangba ia gitko angni ku·sikchi ku·gape ring·angkugen” . 1901 bilsio uko   gopani salo aro uko gisik ra·na maniani salrango ia gitko a·song gimikon ring·aha. 1912 bilsio dal·begipa jahas Titantic, Atlantic sagalo suuri tin·akgipao cha·tinge a·sel ong·aha aro mande sak 1500 ua jahaso songregiparang siaha. Ua a·sel ong·anioba jahaso doka-dam·giparang ia gitko sulchi salaha. Ia gitko Unitarian mondolini mande tariani gimin uamangni giljao mangmang ring·aijaha : indiba pilak biaprangon mangderangna ka·dimeaniko aro pattianiko on·na Isol dingtangcha ia gitko jakkalaha. Ia gitara manderangni ka·tongko Isolona sepangbatna aro che·aniko on·na dakchaka.

Pagipani Mes Bi.sa

                                                                                                                Smt. H.A.Sangma

                                                                                                                     Tura, Hawakhana

Pagipa Abraham aro depante Ishaak, paningsa sakgni Moria a·brini ja·paona sokangahaon, Abraham an·tangni nokkol sakgniko donange, paningsa sakgni, depanteni pakreo am·bolkogate Moria a·brini kosakona doangengmitingo, aiao  inman·pilgipa golporangko ka·ang-engachim. Depante Ishaak an·tang pagipako namen chanchia gnang sing·engachim O  apa! Unon ua inaha, O angde, iako anga, aro ua ina, nibo wa·al aro am·bol gnang indiba kamna dobok bi·sa baosa! A·ba. 22:7 aro Abraham inaha, Homna dobok bi·sako Isol an·tangna donsogen, angde!!! A·ba 22:8. Ia paningsani golpoara, pagipa Abraham, depante Ishaakko boli on·a sianiara, pagipa Isol an·tangni saksa kam·kam depante Jisu Kristoko skobikrokni a·brio boli on·asiani noksako ga·akgimin a·gilsakna mesoksoanisa ong·achim. Uani gimin Johan napolatgipaba kristoni gimin indake aganaha, “Hiwa nibo Isolni Mes Bi·sa, a·gilsakni papko ra·anggipa”. An·chingni pagitcham, ma·gitcham, Adam aro Hoba papo ga·akahaon, ga·akgimino mande jatko paponiko piokpil·na gita mamung cholan dongjahachim. Jringjrotna gimaanisa ong·na siengachim, ka·sachakbegipa Isol jringjrotna gimachina watim-bangede galjaha. Mande jatko paponiko piokpil·na man·a gita mingsa mang·mang cholsan dongaia-hachim. An·chingni Gitel Jisuko boli on·gnini, Isol Abrahamna ua indake parape·soaha, “Nang·o pilak jatrang patiako man·gen ine Nama Kattako aganpraksoaniara bilsi 2000 mango pagipa Isolni skako chu·sokatna gita depante Jisu Kristo mandeni bimango re·baaha. Uni giminan Jisu indake aganaha, “Iani gimin pagipa angna ka·sara, maina anga angni janggiko on·chaka, ukon maikai ra·pilna man·gen. Johan10:17 Indake Nama Katta, Mati, Mark, Luk aro Johan iarango nama kattarangko pilakchinan gipatangaha. Ua nama katarango, depante Jisu aro pagipa Isolni miksonganiko kakket chu·sokataniko nikna man·aha. Indake ong·engon satanni tol·gipa aro kakketgijagipa kattarangkoba nikna man·skaa. INDIDE JISUKO SAWASA SO·OTA? An·ching pilakan mesrang gita brangaha. An·ching sakantin an·tangtangni re·ani ramachin pil·angaha; aro Jihova an·ching pilakni namgija dakaniko uni kosako gataha Isaia 53:6 indiba uko bnekatna Jihova namnikaha; uko ua siataha; Na·a uni janggiko papna boli dakon ua an·tangni bitchriko nikgen, ua an·tangni salrangko bakroatgen, aro uni jako Jihovani namnikani silgen. Isaia 53;10. Indake depante Jisu Kristo mande jatna papni bojako chilja siengon, mande gita ong·e sina namen simbrabee, Gethsemani bario ding·ol gramchipile pagipa Isolo bi·engon,Uni ding·ol gramchini chian an·chi baksa jokbaaniara, an·chi ong·gijade pap wata ong·ja ine mesokani ong·a.Ibri 9:22 ua somoirango satan Jisuni janggiko ra·na man·a gita namen rakbee kam ka·enganikoba nikna man·gen. Indake satan mande jatko paponiko piokpil·na Isolni kam ka·aniko bon·chongdikatna joton ka·beeng-achim.              Jisuni bakrao sal sotbri aro wal sotbrina okumu chake Isolo bi·ani ja·mano satan changgitamana kingking dakmajoaha. Skanggipa dakmajoanio ro·ongrangko pita pil·e cha·china ge·etaha. Gnigipao gilja nokni protchongoni chokonchina ge·etaha aro gittamgipao chubegipa a·briona rimdoange, satan an·tangko olakichina dakmajoaha indiba Jisu an·tangan Isol ong·ani gimin pilakon dakna amgenchim-oba,gimagimin  a·gilsakni mande jatko pioknasa re·-baani gimin, Jisu an·tangko Pagipa Isolni namnikgnikosa dakskae Isolni kattachi satanko cheaha. Bon·kaman salrango Isolni manderangkoba pilak gitan dakma-joanirangko ra·baenga, jedake ong·sigipa cholon bewalrangchi, kragijagipa ganding, chindingrangchi rongtalgijagipa cha·a ringanirangchi aro Isolni niamko jegalanichi janggini gimaaniona dilangenganiko man·enga. Ua salrango Isolni manderangba apsandaken Isolni katachisa mangmang satanko warachakpana man·aigen. Uni gimin sastroo agana, Isolni pilak tarianiko ganbo. Dondikgija bi·bo! I Thess. 5:17 Eph. 6:13. Pilak ma·manti namgijanirang-oniko an·tangtangko rakibo. I Thes. 5:22.  Bon·kamgipa satanni skaniara Jisuna sianiko ra·bana rakbee kam ka·aniko an·chingna mesokaha. Jisu satani tol·napko niksoengon, Jisu Gethsemani bario sina simbrabee bi·engon, O Apa ong·na man·ode, ia ringchakani angoni chel·angchina, indiba angni namnika gita ong·gija,Nang·ni namnika gitan ong·china. Mat. 26:39. Pagipa Isol depante Jisuni bi·aniko ra·chakaha aro Jisuona Gabriel sa·greko watate ka·dimeaniko on·aha. Indake Jisu sina ka·donganiko man·e, an·tangko skobikrokni chisolo boli on·aniko chu·sokatna mang-songaha.Donsogimin sal sokbaa-haon satan Iskariot Judasko jakkalaha. Indake Iskariot Judas sipai kotoko aro kamal dal·gipa-rangni aro manderangni me·apa-rangoni tonual aro monggotko rabite bil·cham aro tochriko ra·e Jisuko rim·na re·baahaon, Jisu an·tangni kosako ong·gni pilakon u·ie, sako a·ma? ine uamangna aganaha. Uamang una aganchakaha Nazaretho-oni Jisuko. Unon Jisu uamangna aganaha, angan Ua. Johan 18: 5. Jisu angan Ua ine aganon uamang tang·pile a·ao ga·akaha. Johan 18:6. Uamang satani bilko jakkale Jisuko rim·aniara satani sianiko ra·bana bilgrigipa ong·a ine mesokani ong·achim. Ua satanni bilara Isolni bilna mamungba ong·ja ine mesokani ong·achim, indiba depante Jisu Pagipa Isolni skako chu·sokata gita an·tangko bobilrangni jako rim·na on·aha. Mandeni skani gita, Pitor kamal dal·batgipani nokkolni jakrachini nachilko den·pakaha. Uan Isolni namnikani ong·jani gimin, Jisu pitorko agane inaha, nang·ni tonualko chukopo dobo. Anga Pagipani on·a ringaniko anga ringjawama? Ine manenge, ua nokkolni nachilko dangdike namataha. Indake Jisu Kristo Pagipa Isolni daksogimin planko sastroo katchinikgiparangni se·a chu·sokchina ia pilakon ong·na on·aha.            Ga·akgimin a·gilsako piokpil·na gita, Jisuko cha·ugipa aro dokprete ra·gipako gita rim·e, Anna kamal dal·batgipaona aro kaiphas kamalona rim·angaha. Misilgipa papni kamrangko dosgrigipa Mes bi·sani (Kristoni) kosakona ra·baaha, jedake Jisuni mikkangko studapaha, mikronko katipe, nang·ko sawa dokaha katchinike aganbo ine chonikaha. Ua somoirango Gitel Jisuara sontolgipa Mes bi·sa gita an·tangko on·aha. Unikoa koedi gita an·chingni Gitelko Pilatona watataha. Pilat Jisu Kristoni kosako mamung dosko man·jae aro Jisuara Galilini mande ong·a ine u·ie Herodonan Herod rajaba Jisu kristoni mamung dosko man·jae pilatonan watatpil·aha. Walni somoio pilatni jikgipa kenbegnigipa jumangko nike, Jisuara janggini Raja Isoloni re·bagipasa ine ma·sie an·tangni segipa pilatona koborko on·ate ua toromi mande baksa nang·ni mamungba nangpajachina ine champenganiko dakahachim, indiba pilat Isolna bate manderangna kenbataha. Indake pilak Jisuni kosako mamung dosko man·jahaoba Jisuko betsmitchi dokenba chisolo datkapchina bobilrangni jako on·aniara pilat an·tangni ka·pongko mesokaha aro an·tangni bilgri-anikoba sakki on·aha. Indake pap simteka grigipa aro papko u·igijagipako papigipa dakataha. Unon uamang Jisuni gana chinako kike pamongni kancha gitchakmrangko ganate, uni skoo bu·suni mukutko stikate aro uni jakuao tulu ge·sako on·e uni mikkango ja·sku dipane salam, Jihudirangni raja ine kal·stape roaha. Studapaha aro tuluko ra·e uni skoko dokaha. Ian papni ka·namgijaniko mesokani ong·a. Jisuko kal·stapmano uamang kancha gitchakmrangko kike kanchatangkon ganate chisolo datkapna rimangaha. Kancha gitchakmrangara sason ka·gipa-rangni gananisa ong·achim. Bobilrang Jisuko kal·stape ronamangmangsan uko ganataiaha, indake dakanichi satan ba Lucifer an·tangni ka·namgijagipa cholon bewalko mesokaha  SIA ARO GOPRAM : Siani aro gopram bilsi 2000 na skangan re·baengachim gopram bilsi 2000 sokon gopram-rangko cho·engachim, unon sia gopramna aganaha, na·a Jisuko u·iama. Oe anga u·ia ine gopram aganchakaha. Siatode una gopram chakgenma? Oe una chakaigen ine gopram aganchakaha satan Jisuko chisolo siatahaon, uni manggisiko ra·angna pilatchi re·ange bi·nasiengachim pamong sipai-rangoni saksa Jisuko oksikko su·ahaon, oe Jisu silbebeaha ine nikahaon, aiao!!! satan kusi ong·bee inaha, oe anga Jisuko siatna man·aha ine ka·dongani gape sia pilatchin re·ange manggisiko gopramo donon, gopram nitimgiparang baksa gopramni ro·ongko namedake mohor su·e gopramko simsakbee donaha, maina sia salgittamni ja·mano chakatpil·gen ine u·iman·ahachim Jisuni janggiko gimaatna joton ka·beengachim.           Oe Jisu neng·takani salo tom·tombee neng·takaha, indiba neng·takani salni chon·kamao antini skanggipa salni pringwalni namen banggribeaha aro salgioni Gitelni sagre ong·onbaemung gopramni ro·ongko romtome uni kosako asongaha. Uni mikkang mikka riprapa gitachim aro uni kancha suuri gita bokachim. Jisu gopramni dogacholo chadenge gambee inwataha “Angan chakatpila aro janggi, ango bebera·gipa sioba tanggen. Johan 11:25, ia namen moaha aro nitimgiparang kenani gimin sigiminrang gita ong·pilaha.  da·nang gopramde ro·ongni mitinosa dongengachim. Jisu inwataha, anga an·tang janggiko on·aha.  Sia nang·ni ama baoa, O sia nang·ni biri bao goprmoni ong·katbaaha Jisuko drangba chakatatjaha indiba Jisu an·tangan janggiko on·aha Oh sia goprama bao ine sia gopramoniko am·engachim, indiba Jisuni manggisi gopramo dongjajok maina Jisuan siako chesrangaha. Sia bilko man·jajok. Indake Jisu kristoara nang·na aro angna siani gopramko gimaatsrangaha. Uni gimin Jisu aganenga,“Anga siahachim aro nibo, anga jringjrotna tanga, aro ango siani aro a·ningni chabirang gnang Para. 1:18.Uan Isolni manderangna dalbatgipa ka·dongani nisanko skobikrokni a·brio songe donangaha. Bebe ra·gipa sakantian ua che·ani nisanko nidogenchimode, an·chingba Kristoni gnigipa re·bapilanio, sigimin toromirangkoba jringjrotni janggiona chakatatpiltaiako man·e, O sia nang·ni ama bao? O sia, nang·ni beri bao? Ine che·ani ku·rangko knana man·pagnok. Ua che·anio sia mamung saloba bil man·taijawaha, maina siade jringjrotna gimaatako man·sranggnok, indake ua somoio tange dongsoenggipa toromirangba apsandaken mikjapsani gisepon dingtang dakako man·e gimagnigipa bimang gimagijaniko ganna aro signi sigijaniko man·e apsan toromi chakatatako man·giparang baksa damsan bangbango Gitelko grongna aramrango uamang baksasa rimdoako man·pagen ine sastroo an·chingna parape·soaha. Indake rasongarigipa gronggrikaniko man·a sienga. Ua gronggrikanio an·tangtangni gimaatgimin ka·sagipa ma·a paarang atchu ambirang, jong-ada no-abi aro ripengrangko grongtaie agansokpilgija katchaaniko man·a sienga. Ua katchani salko sakantian man·pana sikgenchim. Ua salode siani bilde gimaatako man·a siengaha, maina chon·kamani bobil ine sia gimaatako man·a. I Kor. 15:26. Indake amgipa changgni siani saknaako man·jawa Para. 2;11. Un salo toromirang siani kosako chesrange, jringjrotni janggiko changsatai man·pilna sianiara, aiao inman·gipa Isolni ka·sachakaniko nikna man·gen aro ka·dongatanikoba man·gen. ua ka·donganiara Isol an·tangni bilchi Gitelko chakatataha, aro an·-chingkoba chakatatgen I Kor. 6:14. Uni gimin an·chingkoba mikrakatenga,“na·simang nichaobo, sko de·chaobo, maina na·simangni piokani sepangjok Luk 21:28. Maina ia a·gilsakni bimang re·anga. I Kor.7:3. Uan gitcham a·gilsakni bimangara Jisuni re·bapil·anio wa·alchi rongtalat-gnini gimin agansoenga. Uni gimin na·simangba tarie dongbo, maina na·simangni chanchisogijan salo Mandeni depante re·baa. Mat. 24:44. 

   RAE ON.ANI A·KONGDAP(Joel 3:14)

                                                                                                                                                       Pastor. Garfield  S. Sangma

  “ Noani salo maikai, uandake Mandeni Depanteni re·baaba ong·gen “ (Mati 24:37).

Lamekni depante Noa saksa kaketgipa mande ong·achim.Ua Isolni pilak ge·et-anirangko manie rongtale janggi tangaha. Sastroo agana, “…Noa Isol baksa re·ruraachim” (A·bachenga 6: 9). Isol baksa re·ruraa ingipa kattani gimin chanchie niatbo, Noa baditan Isolni kattana bame kaket ong·e re·rura·enggenchim! Noa saksa Isolo bilake bebera·gipaba ong·achim. Isol an·tangni dakgimin manderangko a·gilsakchiniko niaton dugapile  namgijako nikataha. Ua mandeko ong·atani gimin Uni Gisiko duk ong·pilaha (A·bachenga 6:6). Isolni Gisik manderang baksa chakchikchana man·jaha. Isolni chakchikaniba sima-ari gnang ine Sastroo nikna man·a. “…Angni Gisik mande baksa jringjrotna jegrik-jawa…” (A·bachenga 6:3). Unon Isol mande aro a·ao donggipa pilak janggi gnanggiparangkon chichi nisina mangsongaha. Indiba Isol an·tangni  nikanio kaket ong·e re·ruraani gimin Noana ka·saaha. Isol Noako cha·chat bolni ring bolsako dakchina ge·etaha (A·bachenga 6:13-16). Noa Isolni ge·etani gitan pilakkon tiktak dakna a·bachengaha. Ua manderangko uamangni pilak namgijarangoni gisik pil·e Isolona an·pilchina aganprakaha. Ian Noani bebera·aniko dal·begipa Isoni dake niani ong·enggenchim, maina Noa manderangna gisik pil·ani gimin skiprakrongachim. Badiaba manderangde indake aganprakani gimin uko kal·steke ro·enggenchim ine an·ching chanchiatna man·a. Noa Isolni agangimin kattarango bebera·e, Isol a·gilsako donggipa pilakkon chichi nisina sienga, gisik pil·e pilak namgijarangoni Isolona an·pilbo ine manderangna agan-prakrongaha. Indiba manderang Noani aganprakana gisik nanggija batesa namjabatroroe janggi tangaha. Noa manderangni an·senge cha·eringe romiting salrangode baditan Isolni agangimin kattana bame dal·begipa ringko dakna jakchakjaenggenchim ine an·ching chanchiatna man·a. Noa dal·begipa ringko dake matchotani ja·mano Isol una aganaha, “Maina salsnini ja·mano anga sal sotbrina kingking walang salang a·ani kosako mikkako waatgen aro angni dakgimin pilak janggi gnanggipakon a·aoniko kimitgen” (A·bachenga 7:4). Ia kosako janapgipa Isolni Kattarangko an·ching chanchie niatgen-chimode, Isolni an·tangni dakgimin manderangna baditan ka·saaniko nikatna man·a. Isol manderangko gisik pil·china bilsi ritchasa kolgriknade seng·e dongaha.Indiba manderang Isolni Kattarangna nachil songgija batesa namjabatroroe janggi tangaha. Isol an·tangni ong·atgimin manderangna ka·sakue uamang gisik pil·e an·tangona re·bapilchina salsnina bon·kamgipa cholrangko on·kuaha. Isolni Kattarango agana, “Saniba saniba ka·sinika, gita Gitel an·tang ku·rachakani gimin ka·sinja ; indiba na·simangna chakchikgipa, ua saksani gimaaniko, namnikgija gisik pil·aona pilakni re·baaniko namnika”(II Pitor 3:9).Indiba manderang Isolni Kattana kna-chakjaha. Isol Noana aganaha, “ Na·a  aro nang·ni nokgimin ringona naptokbo” (A·bachenga 7:1). Ian dingtangmancha Isolni sakantiko an·tangona okamani ong·a. Apsandake Gitel Jisu Kristoba an·tangni daksogimin jringjrotni janggiona sokatna ske sakantikon an·tangona okama.   “Beben anga na·simangna agana, Angni kattako knae angko watatgipako bebera·gipan jringjrotni janggiko man·aha, aro bichal ka·aona re·baja, indiba siaoni janggiona bataha”(Johon 5:24). Anga saksa Isolni a·bao an·tangko on·kange kam ka·gipa ong·e, da·alo nango mingsa dal·a sing·aniko sing·enga. Na·a Isolni on·gimin dal·begipa Jokataniko ra·chakahama? Isol an·tangan ringni do·gako chipaha ine Sastroo agana (A·bachenga 7:16). Noa ringni do·gako chipna nangjaha. Apsandake jokataniba chu·gimik Isolni jakon. Ua ringona napna do·ga ge·samangmangsan dongaia, aro ua do·ga da·o chipaha. Salgiona re·naba rama cholsa mangmangsan dongaia ine sastroo agana, “Angan rama, aro bebe aro janggi. Angko re·jaode pilakba Pagipaona re·ja” (Johon 14:6) Isol an·ching sakantina ka·donganiko on·aha. Nang·ni siani ja·mano nang·ni janggi jringjrotna Jisu Kristo nang·na biapko tarisoaha. “Na·simangni ka·tongko jajrengatjachina. Isolo bebera·bo,angoba bebera·bo  Apani noko dongani biap bang·a;... maikai anga jeo donga, na·simangba uano dongna man·gen” (Johon 14:1-3). Na·a Jisu Kristoni agangipa katta-rangko bebera·e Jisuko nang·ni ka·tongo Jokatgipa Gitel ine nang·ni gisik ka·tong gimikchi ra·chakode, Uni ku·rachakgipa salgiona re·na ba re·bapilani sal sepangchongmotaha ine nikna man·gen. Bang·a manderangan siani ja·mano uamangni janggi (Joel 3:14). Bang·bata manderangan jensalo uamang buchuma budepa ong·e uamangni janggi tangani bon·kamgipa salrangko ga·dapengon an·tangtangni janggina jajrengronga. Anga iako bang·a buchuma budepa aro sanna man·gijagipa, biatiko man·gipa manderang baksa agangrike u·ina man·a. Uamang an·tangtangni janggina mamingkoba dakna u·igija rae on·ani a·kongdapo ong·ronga. Na·aba da·alo rae on·ani a·kongdapo ong·engama? Na·a indakgipa obostarango ong·engon maiko dakgen? Haida na·a siani ja·mano angni janggi bachi re·gen salgichima norokchi iani gimin chanchie jajrengengnaba donga. Indakgipa obostao ga·ak-enggipa manderangna anga ia 2013 bilsio mingsa ka·dongani katta,salgichina re·ani ramako mesokatenga. Sastroo agana,  … “Gitelni bimingo bi·gipa pilakkon jokatgen” (Watata 2:21). Na·a jringjrotni suk salgio dongna skode a·gilsakko jokatna re·bagipa Gitel Jisu Kristoko bebera·e Uko nang·ni ka·tongona bi·achi okambo aro ka·mao on·atenggipa bi·anirangko  nang·ni gisik ka·tong gimikchi bi·bo:-Salgio donggipa Apa, anga Nang·ko dingtang-mancha ia somoina mitela. Gitel angni janggina jajrengengon na·a da·alo angna chong·mot-gipa ramako  mesok-aha. Anga angni janggi tangani salrango ong·gija dake salko re·ataha. Na·a angni pilak paprangko kema ka·bo aro nang·ni an·-chichi su·srange rongtalatbo. Gitel Jisu na·a angni ka·tongo Raja ong·e sason ka·bo. Anga da·alo chu·gimik an·tangko nang·nan pakwata. Jisuni bimingo bi·a. Amen.                   

Satanic Bibleo Satanni Agangipa Kattarang

Beatitudes: Chapter 13.                                    

                                                                                                              Pe·skagipa: Dr.P.G.Momin, M.A;D. Litt; Ph.D.

                                                                                                                                         Lower Baiza, Williamnagar

1.An·senga uamang, jemangan gilja re·na somoi donggijagiparang, Bible poraina namnikgijagiparang aro aratgiparang, maina uamang angni nambatgipa kam ka·giparang ong·a. 2.Isolo bi·gijagipa kristianrang an·senga, maina anga (Saitan) angni gisikko uamango rudapgen aro uamangko norokni wa·alchi kari pugen, unon namgijagipa gisikrang uamango ching·chae pilak rokom kattarangko agangen aro mitchigni kamrangko dakna katchaagen. 3. An·senga uamang, jemangan gisik saninggiparang aro sakgipinni an·tangko mitelaniko nangnikgipa kristianrang maina uamangko anga jakkalna man·gen. 4.An·senga uamang, jemangan Isolni skianiko am·gija a·gilsakni  kusinirangko mikpakma nigiparang maina uamangan angni missionaryrang ong·a.5.An·senga uamang, je mangan golmal kajia dakdilgipa-rang, maina anga uamangko angni dedrang ine minggen. 6. An·senga uamang, jemangan gilja re·jringe aro mondolini kamko jako ra·e ka·gipa-rang indiba saksa sakgipinko matnange agangipa aro mitak-rakgiparang maina uamang angna kam ka·chongmotgiparang ong·a.7. Amitrakgipa kristian me·asa ba me·chikrang an·senga, maina uamangan angni namgipa ripengrang ong·a aro uamangni nokdango, songo noko aro mondolio angna biap on·giparang ong·a.8.An·senga uamang, jemangan  tangkarangko an·tangtangni nanganirangnasan jakkale Isolni kamna on·gijagiparang aro bakchikkungni baksa ba Titheko on·gijagiparang, maina uamang angna dakchakgiparang ong·a. 9. Kragijagipa kamrangchi jedake joa rokrok kal·anichi (all kinds of gambling) gam-jin ba tangka paisa man·dapna gisik nanggipa kristianrang an·senga, maina uamang angni songnoko nambatgipa kamai ka·giparang(earners) ong·a. 10. An·senga uamang, jemangan Isolna ka·saa ineba jongada aro noabirangko mitchia, tol·e matnanga aro kema ka·na man·gijagipa kristianrang, maina uamangan ang baksa jringjrotna noroko  dongkam-pagen.11.An·senga uamang, jemangan kristian inenba Bibleo skianiko aro gisikni gita salgini ku·sikrangko aganne olakkianiko jegalgiparang maina uamang angni nambatgipa sninggiparang ong.a.12. An·senga uamang, jemangan an·tangtangko kristian inenba Isolni Kattana kratcha·giparang aro Isolko gisikni gita olakkigijagiparang aro be·enni sikanirangko watgal-gijagiparang    jedake mikboka, an·chaani, miknenga, wal·ku ringa ba pekgipa ringanirangko ringgiparang maina uamangni be·en aro gisikrang ang baksaan aro  noroko saknasitengtoaniko jringjrotna  angming bak man·pagen. 13. An·senga uamang, jemangan giljao sastro skimitingo tusidimua, maina uamang Isolni Kattaoniko maming skianiko man·jawa, batesa aratani gisik bariroroe cha·asiani gnang angna bimchipe dangdike on·giparang ong·gen.14. An·senga uamang, jemangan kristian ong·e gamseng aro a·achini bidingo noksul baksa kajia golmal daka, maina uamang ang baksaan norokko man·rikgen. 15. An·senga uamang, jemangan mondolio meligrikgijaniko ong·atgiparang, aro ma·mal ge·saoni ge·gipinona katjojogiparang. Maina indakgipa rokomni kristianrangkon angni kamna anga jakkalna man·bata. 16. An·senga uamang jemangan bobil dakgipako bobil dakskaa, saiani pal saiskaa, so·otani pal so·otskaa, aro chakchikna man·gijagiparang angni kamko nambate dakgen. Tom·-tomaniko watgalbo aro an·tangnasan chanchirakgipa ong·bo maina be·enni gita man·dapani bang·en gnang. Sao on·bo aro maming saloba nang·ni bobilna pattinabe. 17. Angan (Satan) a·gilsako pilak namgijanirangni raja ong·a, angna kam ka·giparang a·gilsako kusi ong·batgiparang, manderangni mande ra·aniko, mittelaniko aro mingsing minggamani ko man·giparang ong·a. 18. Isolna bate angna ka·sabatgipa kristian-rangan a·gilsako kusi ong·batgiparang ong·a maina uamang jeko sika ukon dakna misilgija aro kratcha·gija dakna ka·donggen aro anga jeo donga uanon uamangba ang baksa jringjrotna dongkampagen. Angan Norokni raja aro wa·alni wariona rama ong·a. (Satan says, “I am the Prince of Hell, and the Way to Lake of Fire”). (Satanic Bibleoniko pe·skaaha. Satanic Bibleko Anton Labey seaha. Ia Biblekon mikkangchi One World Government aro One World Church jakkalgen jekon Parape·a Odai 17-o agansoman·aha.)  Talbate ma·sina sikode angna see u·iatna man·gen.

E-mail: pgm.gmc@gmail.com

On·tisa U·ie Ra·bo

                                                                                                              

                                                                                                           (Ma. Chonsey A. Sangma)

   Q. Salgiara maia ? Aganchakani : Salgiara …

 #1) Isolni dongram :  Mati 6:9 “Unigimin na·simang indake  bi·bo, O salgio donggipa chingni Paa, nang·ni bimingko  rongtala ine intokchina”.

#2) Isolni rikgimin nok :  II Korinthirangna 5:1 “Maina chinga u·ia, chingni ia a·gilsakni tambu nok  be·gipuode, Isolni rika, jakchi dakgija, jringjrotna donggipa, salgio chingni nok gnang “.

 #3) Isolni jam  :  Mati 3:12 “ Uni jako uni ruan gnang, ua an·tangni nakramko namedake rongtalatgen, aro an·tangni miko jamo chimonggen …”

.

#4) Isol aro Jisuni songnok :

Ephesusrangna 5:5 “Maina iako na·simang u·ienga, til·ekgipa, ba rongtalgijagipa, ba mite dakaniko olakia gita chacha mikbokgipa saksaba Kristoni aro Isolni songnoko man·rikaniko man·ja”.

#5) Apani nok :  Johon 14:2 “Apani noko dongani biap bang·a …”.

#6) Neng·takram nok :

 Ibrirangna 4:9 “Indide Isolni manderangna neng·takani sa dongenga”.

#7) Namgipa bari :

II korinthirangna 12:4 “ua  maikai namgipa bariona rimdoako man·aha …”.

#8) Isolni singhason : Isaia 66:1 “Jihova indine agana, Salgi angni singhason ong·a …”.

 #9) Bebera·gipa sakantina daksogimin biap :  Parape·a 7:9,10 “ Iarangni ja·mano anga nikaha, aro nibo, pilakba uko channa amgija jinma bang·bea pilak jat, aro ma·chong, aro mande aro ku·sikrangoni singhasonni mikkango aro Mes bi·sani mikkango chadengenga ; uamang chola bokako gana, aro jaktangtango kejur bijak gnangchim ; aro uamang gam·bee indine chrikaha, Jokata singhasono asonggipana chingni Isolni aro,Mes bi·sani”.

Lotni jikgipako gisik ra·bo

                                                                                                     

                                                                                                               

                                                                                                           (Ma. Chonsey A. Sangma)

  Wa·al aro gondokni nosto ka·gimin ua chasongo man·e cha·batsraggipa Sodom songjin-mani

a·palo an·ching saksa me·chikni karini krongko nika. Gitel Jisu agana, “ Lotni jikgipako gisik ra·bo” (Luk 17:32). Ian an·ching me·chik sakantina mikrakatani ong·a. Lot aro uni nokdangna Sodomo ong·a obostani gimin an·ching A·bachenga odhai 19-o poraia. Lot-ara saksa Isolna ka·sagipa namgipa mande ong·achim. Ua Sodomni wilwilao donggipa manderangni namgijaniko salantian nikronge pangnan  uni gisiko duk man·rongachim. Unon salsao Isolni Sa·gre sakgni Lotni nokona re·bae, Isolni Sodomko nosto ka·nasiani gimin agane Lot aro uni nokdangni manderangko ua songjinmako wate katchina aganaha.Jensalo uamang songjinmako wate katmiting somoio darangba ki·sang-chiniko nipiljachinaba raken mikrakataniko on·aha. Indiba Lotni jikgipa uamangni mikrakataniko manigija ki·sangchiko nipilon karini krong pil·aha. Lot Isolna ka·sagenchimoba uni jikgipade indake ong·jaha. Uni segipa Lot Sodomni namgijani gimin duk ong·oba uni jikgipade uarangni gimin maming dakeba nikjaha. Lotni jikgipa Isolna kenani gri janggi tangaha aro uandaken uni demechik sakgnikoba Isolna kenna nangani gimin skie on·jaha. Uni demechik sakgnini dal·droba-mitingoba ua Sodomo donggipa uni ripengskarang baksa songsarni kamna jakchakjaen uni demechikrangko nirokna somoikon man·piljaha. Ua saksa bading-chiwale cha·gipa man·e cha·gipa mandeni jikgipa ong·e rasong gragra dake uni sakgni demechikrangkoba Sodomni nomilrangni gana-china  aro uamangni dakbewalrangkosa ja·rikataha. Ua uni segipa Lotni Sodomni manderangni namgija dakbewalrangko jegale aganrongoba uarangna maming knachakgija uni demechik sakgnikode Sodomo donggipa me·chikrangni dakbewalrangkosa ja·rikchina pangnan didirongaha. Ja·man ki·tikode, uamangni demechik sakgnian Isolko u·igijagipa Sodomni panterangkosa se kimsrangaha. Indake ua an·tangni demechik sakgnikon nosto ka·aha.Bilsi hajalbri ong·pilgipa gitchambegipa karini krong me·chik sakantina mikrakataniko on·enga. Nang·ni bi·sarangko nirokna somoiko jakkalbo. Lotni jikgipako gisik ra·bo! Lotni jikgipara a·gilsako gam chimongaha, unigimin uni gisik ka·tongba unon ong·aha. Bang·bata somoirangon ma·giparangba a·gilsakni dingtang dingtang kamrangnasa mikpakma nie dedrangko niroknade somoikon man·pilja. Minggipin me·chikrangna karini krongoni indakgipa mikrakatani re·baenga : An·chingni mikronchi nikgipade dikdiksanasan. Lotni jikgipako gisik ra·bo! Sodomo donggipa Lotni jikgipani ripengrangara a·gilsakni ku·sik sel·tagijako agangipa cholon tik ong·gijagipa me·chikrangsa ong·genchimoba uade uamang baksa ripeng dakna maming neng·nike nikjaha. Bang·a me·chikrangan Isolna dangdike on·anio dingchike kam ka·na man·ja, maina uamangni ripeng-rangan a·gilsakni Isolko u·igija-giparangsa ong·a. Indakgipa me·chikrang baksa ripeng dakon uamang a·gilsakni sel·tagijagipa ku·sikrangko uamangni agan-grikanirango jakkalronga. Uan-dakgipa me·chikrangnaba ua karini krongan mikrakataniko on·enga : Namgijagipa ripengrang nang·ni Isolna dangdike on·anio nang·ko bilgriata. Lotni jikgipako gisik ra·bo! Jekoba aganbo ki·sang-chiko nipilanide pangnan kenbeani ong·a. Na·a mondolini krong ong·pilahaoba nang·ni gisikni gita tang·doe janggi tangaoniko ra·one nang·ko karini krong pil·ata. Me·chikrangba papko chee janggi tangode  mondolini krongrang ong·a ine Isolni kattarango agana (Parape·a 3:12). Hai an·ching Isolni mik-rakataniko knachakna aro batanggimin salrangni   ong·anggiminrangko gualsrange gital daktaina. Uani gimin chanchitainabeha. Lotni jikgipako gisik ra·bo! “… Janggi jokande katbo  ja·manchiko nipilnabe : aro ia pilak a·kaweoba      dongnabe; a·briona katangbo; nang·ko so·otnaba donga” (A·bachenga 17:17).

Ian angni chagrongipa ong·chongmotgipa

obostarang ong·a ine sakkiko on·a ska

                                                                             Mr.Stroline T. Sangma

Anga  Tangipa Jokatgipa Jisu Kristoko mitelchengna kusi ong·a, maina ua angni be·eni gita

signioniko angko naljokataha. Pagipa Isolko anga gisik ka·tong gimikchi mitela, maina anga siginokchim indiba Kristoni ka·sabeachi anga da·o tangenga.  Chingko   jasana buringo donge duty ka·china watatako man·e, chinga duty dongna gita biapko man·e antigni mang gapengon ran·gitik walni gni baji mang tiktako chingni dongipa campko bobil dake chakatgiparang gona (attack ka·na)  a·bachenga, chinga gimikan mamingkoba dakna changpilgija dikdiksanade nawang dake dongchengaha, chinga uamangni goaniko (locationko) name ma·sijaengachim, uamang chingko biap gegnio donge gochichiengachim, chinga aditana uamangni goomangba chingade gochakgija dongaiaha. uamangni gogipa biapko name ma·siani ja.manosa chinga gochakataniko dakna a·bachengaha. Uamang  chingko bilongen goaha, angade aganan chanpiljajok. Angade skangipa indakgipa obostarangko  chagronge nikpae angni ka·tongo maiba dakpile kenanirang gapaha aro anga indakpile be·en moe tiltilpilaha maina angade be·eni gita sina namen kenbeengachim. Chingming adita gogrikani ja·mano uamang katna a·bachengaha  aro uamang kataba kataiaha.  Anga ia pilak ong·ani gimin namen chanchibeengachim, anga darangni giminba  chanchijaha anga an·tangni giminsan chanchibeaha, ia chagronganira angna maina ong.na nanga ine angni gisiko sing·anirang sokbaaha unon Isolni Gisik angna agana a·bachenga. Unon anga an·tangni rongtagijaniko nikataha. Anga un attamo ong·gijagipa mitchibegipa rongtalgijagipa kamko dakaha, anga ua attamo angni ripengskani mobileko nie roengachim aro ua mobileo namgijagipa ong·gijagipa  noksa rang (Porn video) bang·beachim, anga namen suk ong·e nie roaha. Isolni angna aganani ja·mano anga naman duk ong·e grapee Isolo kema biaha.  Maina anga  Isolko ma·sigipa saksa ong·eba aro  jokatako man·eba indakgipa ong·gijagipa rongtalgijagipa kamko ka·aha. Anga ua walo sina nanggenchimode angni janggi bachi ong.genchim, maina anga angni papni gimin Isolo kemako bi·srapjawahachim indiba Isol ka·sachakgipa ong·e angni janggina ka·sachakaha aro Ua angko siaona galonjaha. Anga bebera·a Ua angko ua namgijagipa ramaona re·anganiko nangnikjae ia indakgipa obostachiba angko skiaha ine bebera·chongmota. Sastroo agana ‘Isol uni ka·sagiparangko doke skia’  (Ibrirangna 10:26)-o indake  agana;  “Maina bebeko u·ianiko ramanao; an·ching skatang papko dakrongode, indide papni gimin boli dongjajok”.  Anga  Jisuko u·iani ja·mano ia indakgipa kamko ka·niara namen Isolni niamko pe·ani ong·achim. (I Korinthirangna 3:16,17) “Na·simang Isolni torom nokdring ong·a, aro Isolni Gisik na·simango donga ine na·simang u·ijama? Saoba Isolni torom nokdringko gimaatode, Isol uko gimaatgen; maina Isolni torom nokdring rongtala ong·a, aro na·simang uan ong·a”.  (I Pitor 1:16) maina sea gnang, na·simang rongtalbo maina anga rongtalala.  “Uan angni katnapram aro angni killa ong·a; Angni Isol jeo anga ka·donga.” (Git.91:2) Isol poraisoengipa sakantina patichina.

Isol Angna Simsaka

                                                 

                                                  Miss Juliet  S. Sangma

                                                                                                                                 Shillong

 Isolan an·ching sakantini nokgipa ong·a. Ua an·tangni dakgimin sakanti manderangna ka·saa. An·ching ia a·gilsako janggi tangengon bang·a dingtang dingtang neng·nikanirangko chagrongna nangronga. Indiba an·chingni salgio donggipa Pagipa Isolara an·chingna dakchakna maming dakeba gualja. Uni ka·sae dakani aro an·chingko dakchakna ku·rachakanirangko an·ching Uni Kattarango nika. Uarangoni aditako ka·mao see mesokatenga

1. ANGNI JAJRENGANI SOMOIRANGO ISOL ANGNA SIMSAKA

Gitrang 55:22 “Nang·ni balko Jihovao galangbo, unon ua nang·ko rim·chakgen ; Kakket dakgipako jitatna ua pangnaba on·jawa”.

Philippirangna 4:6 “Gitel sepangon. Mamingnaba sintenabe ; indiba mitelan baksa bi·achi aro mol·molachi Isolna pilakni gimin na·simangni man·na nanganirangko u·iatbo”

2. SIKDIKDIK ONGANI SOMOIRANGO ISOL ANGNI SEPANGO DONGA

Gitrang 27:10 “Angni ma·a aro paa angko watgaloba, Unon Jihova angko ra·chakgen”.

Ibriranga 13:5 “ … Anga maming dakeba nang·ko watjawa, aro maming dakeba nang·ko watgaljawa”.

Isaia 41:13 “Maina anga, Jihova nang·ni Isol, nang·ni jakrako rim·e nang·na agangen, Da·ken ; anga nang·ko dakchakgen”.

3. CHU·SOKGIJANI SOMOIO ISOL ANGNA DAKCHAKA

Mika 7:8 “ … anga ga·akoba, anga chakatgen ; anga andalao asongoba Jihova angna seng·a ong·gen”.

I Pitor 5:10 “Aro pilak ka·saani Isol, Kristoo an·tangni jringjrotni rasongona na·simangko okamgipa an·tangan, na·simang dikdiksana duk man·manoa, na·simangko chu·sokat mangrakat, bilakatgen”.

4. ANGNI KADONGANI GRI ONG·ON  ISOL ANGKO BILAKATA

Joshua 1:9 “Anga nang·ko ge·etjahama ? Bilrake kengija ong·bo ; kengoknabe aro kenchaknabe ; maina nang·ni re·ani jeba ong·chong, nang·ni Isol Jihova nang baksa donga”.

Romrangna 15:13 “Aro ka·dongani Isol bebera·ao na·simango pilak katchaaniko aro tom·tomaniko gapatchina, na·simang maikai Gisik Rongtalgipani bilo ka·dongao suakgen”.

5. KENANI SOMOIO ISOL ANGNA CHEL·CHAKA

Gitrang 91:2 “ Jihovani gimin anga agane ingen, Uan angni katnapram aro angni killa ong·a ; Angni Isol, jeo anga ka·donga”.

Gitrang 121:7,8 “Pilak namgijarangoniko Jihova nang·ko rakkigen, Nang·ni janggiko ua rakkigen. Da·ontaltal jringjrotna king king Nang·ni re·ongkatako aro nang·ni napbaako Jihova rakkigen”.

6. DUKNI SOMOIO ISOL  ANGKO KADIMEATA

Isaia 66:13 “An·tangni ma·gipani ka·dimeata gita, anga na·simangko ka·dimeatgen ; aro na·simang Jerusalemo ka·dimeatako man·gen”

Gitrang 4:1 “Angni okamoa angna aganchakbo, O angni kakket dakani Isol ; Angni changketmitingo na·a angko badalao donaha ; Angna ka·sachakbo, aro angni bi·ako knachakbo”.

Nahum 1:7 “Jihova nama, dukni salo ma·chakani ; An·tango katnapgiparangko ua u·ia”

7. ANGA SIOBA ISOL ANGNA JRINGJROTNI JANGGIKO ONGEN

Gitrang 23:4 “Oe, anga siani sakimni a·kongko re·oba, Anga maming namgijana kenjawa; maina na·a ang baksa donga …”.

Isaia 12:2 “Nibo, Isolan angko jokatani ong·a ; anga ka·donggen, aro kenjawa ; maina  Jihova angni bil aro angni ring·ani ong·a ; aro uan angko jokatani ong·a”.

Johon 11:25,26 “Jisu una aganaha, Angan chakatpila aro janggi ; ango bebera·gipa sioba tanggen ; aro pilak janggi tange ango bebera·gipa jringjrotnaba sijawa, Iako na·a bebera·ama ?

Johon 6:47 “Anga na·simangna beben agana, Bebera·gipan jringjrotni janggiko man·aha.

Johon 5:24 “ Beben anga na·simangna agana, Angni Kattako knae angko watatgipako bebera·gipan jringjrotni janggiko man·aha, aro bichal ka·aona re·baja, indiba siaoni janggiona bataha”.

JISU KA·SARA ANGNA

                                                                                                                   Tochri Abigail A. Sangma

  1.Jisu ka·sara angna

    Ang ama-apa agana

   Anga u·isokjaoba

   U’mang angna skia.

  2.Ua angko jokatna

    Re·baa  a·gilsakona

    Ka·saako parape·e

    Sichakjoka angna chisolo.

  3. Jisun’ sichakanichi

   Angna do·ga oaha

   Ang paprangko su·srange

  Uan angko jokatgen.

4. Jisuo bebera·ode

   Chijanggiko Uan on·gen

   Uko ringe tangjringgen

   Kristo baksa dongkamgen.

 5. Jisu angming dongkamgen

     Uan angko re·dilgen

     Jensalo a·sak watgen

    Salgichina Uan rimanggen.

  6.  Angni chonengmitingo

       Nikronga ama- apan·kamko

       Jaktangko chopjole

       U’mang Amen inako.

  7. Angni bi·sa skarangko

       Anga iachi mol·mola

      Hai an·ching pangnan

     Dongkamjringna Jisuo.

MEGHALAYA

                                                                                    (Ma. Fiona R. Marak)

                                  

     (2001-ni sensus)   

     1. Mande jelani : 2,318,822

     2. Lekka pora dongani : 63.81%

     3. Songrang : 5484

  MEGHALAYA ADOKO TOROM JELANI

        1. Hindurang : 13.26 %

         2. Muslimrang : 4.3 %

        3. Buddhistrang : 0.2 %

       4. Kristianrang : 70.3 %

 “ Chakatbo, ia a·songni gro gipengko re·rorobo ; maina anga uko     nang·nan on·gen…”   (A·bachenga 13:17).

                             KA.SAPAE IARANGNA ISOLO BI·PABO

     1. Dal·dalgipa giljarangni tangchapilanina aro giljarang Nama Kattako aganprakna maikai ta·rake ja·ku ga·gen.

   

2. Districtni skotong songjinmarang Shillong, Tura, Jowai, Nongstoin, Williamnagar, Nongpoh aro Baghmara jeon pekgipa ringanirang jekai, drug, ganja aro chu ringanirang chadamberangni janggi tangani bewalrang gita ong·pilenga. Uamangko Isolni dangtape dingtangatanina.

   

3. Kristian political dilgiparang aro sorkario kam ka·giparang Isolko u·ie songsarna aro jatna dingtanganiko ra·bana man·gen.

  

4. A·doko songdongenggipa bang·gija jatrang jekai, Nepalirang, Biharirang, Tibetanrang, Rabharang, Hajongrang, Bororang, Koch-Rajbongshirang, Man jatrang, Dalurang aro gipin chonchongipa a·brini jatrangona Nama Kattako gipatna.

  

5. West Garo Hillsni a·kawe jolrango Muslim jatrangni napdrabae dongenggiparangna Isolni Kattarangko aganprakanina.

   

6. A·doko songdonggipa kristian chadamberangna jedakode uamang Mission aro Church planting-ni kamna ra·bianiko man·gen.

A.chik A.song

                                                                                                     Pastor Garfield. S. Sangma

.                    

                             1.  Pattijok Isolan ka·sae A·chik jatna,

                               Atchieming a·gilsako janggi tangchakpana ;

                               Gamchata  mal-gamrang gapa a·gimikan,

                               Sona, mukta, hira, koila aro gipinrangan.

                          2. Angni song ka·sara A·chik a·song !

                              Siangjok atchu-ambi nang·on tom·tom,

                              Ka·sina a·brirang silang-bolgrim,

                              Rotoa biaprang  sa·atdingding.

                         3. Dongpaja u·iani A·chiko bida-budi,

                             Sokpaja gipin jatkon’ an·tang taningari;

                             Oncheptoka a·sak manden’ Un’ dakgiminko

                             Na·a gri chingni goka gisikko.

                         4. Satatjok Isolan Un’ salgin’ seng·a,

                            Gipangjok a·gimikchin piprae Uni ka·saa.

                            Sengaiku·bo jripjrip chake Un’ salakkimo, 

                            Ra·dotelgen Gitelan chang·sade A·chik jatko.

                              

                        5. Donggenoba nambata an·senga song,

                            Sokjawajok nang·kode jawa- gipin a·song

                            On·gen an·tangkon, chuatgen jattangkon,

                            O, ang’ ka·sara A·chik A·song !

                        6. Miteltokbo, inchrotokbo, chubatao Isolna,

                            Dingtangmancha ka·saae Uni pattiana;

                            Ripingtokbo, gamchatnikbo Uni on·a gamko,

                            Jakwatnabe gipin jatna ang’ Aman’ A·songko.

                        7. Damako gam·kale dokatbo A·chik pante,

                            Pilakan ring·china ku·rang jange

                            On·bone rasongko chubatao Isolna,

                            Ang’ A·chik A·songna Uan pattiangchong !

Gitel angna simsaka

1.  A·gilsakni jrimarang ango ga·akdapon,   

    Gitel angna simsaka ;

    Salgi angko andalgope chanchiarang tangsimon,

    Uan angna simsaka.

2. Tipchanggija mickhirangko, ra·chakani dongjaoba

    Gitel angna simsaka ;

    Tu·gipa papni wariona, anga ga·tuangoba

    Uan angna simsaka.

3. Noksik-nokbak so·sojengjeng, jajrengchipchipoba,

    Gitel angna simsaka;

    Ka·tong rongchu su·pile, kenchipchipna nangoba,

    Uan angna simsaka.

4. Samtangtangchin’ gnal-rang, angko duuloba

    Gitel angna simsaka ;

    Siani salakim-ni a·kongko, anga batsotoba

    Uan angna simsaka.

5. Otoromi dugaapil·e, a·sak dingtangoba

    Gitel angna simsaka ;

    Papni ja·dil su·pripe angko srapnasioba,

    Uan angna simsaka.

6. Ripeng-baju donggija, saksan sikdikdikoba

    Gitel angna simsaka ;

    Ang’ ka·tong srongana, a·sak galchipoba

    Uan angna simsaka.

7. Ak·kal- karap cha·asie, a·gilsak oktongsioba,

    Gitel angna simsaka ;

    Paisa rongdik goparang, ango dongpajaoba,       

    Uan angna simsaka.

Sakantin’ Ku.chil, Sakantin’ Ja.sku                                                                                               Dem.na Nanggen Jisuna

Indiani manderangni sakki on.ani

1.NAGMA : Bollywood-ni saksa mingsinggipa, Tamil aro Telegu film-ni actress 25 December-o ma·gipa Muslim aro pagipa Hindu nokdango atchiaha. Uko Naghma ineba mingachim. Nagma-ni kal·gipa skanggipa film “Baaghi : Rebel of love” jean 1990 bilsio Bollywood-ni 7 gipa mingsinggipa film ong·a. Ua Tamil aro Telegu film-o 1993 oni 1997 bilsiona mongsonggipa ong·e kal·aha. Ua  South Indiani film actress-rangoni saksa ming-singbatgipaba ong·aha. Ua Indiani dingtang dingtang ku·sikrangko ge. 9 na batpilen aganna man·a aro ua Hindi, Tamil, Telegu, Kannada, Malayalam, Bengali, Bhojpuri, Punjabi aro Marathi filmrangoba  kal·aha. Nagma uni chadambe ong·mitingo-nin uni gisiko bebe ong·aniko sandirongachim. Uni manitang, jean saksa pamong ong·a, ua pangnan Nagma-na Isolni Kattarangko aganronge una Isolo bi·chak-rongachim. Ua bang·a bilsirangna Jisuni gimin segipa ki·taprang aro gipin kristian ki·taprangko porairongaha. Ua uni janggi tanganio bang·a neng·nikanirangko man·e an·tangko so·ote sina chanchipil·aha. Indake 2000 bilsio uni manigipa Isolni Kattarangko una aganon ua Jisu Kristoko an·tangni Jokatgipa Gitel ine ra·chake papini bi·aniko bi·aha. Indiba Isolni songnokni gimin name ma·sina una bilsi 5 nangaha. Ua 2006 ni December jaoni Niam Gitalko poraina a·bachengaha aro ua Isolo bi·na aro Sastro poraina bang·a somoirangko ra·aha. 2007 bilsini  January 5 tariko ua chio napolaha. Ua da·ode an·tangko on·kange Jisu Kristoko ja·rikgipa ong·aha. Ua a·gilsakni dingtang dingtang biaprangona re·ange uni janggi tangani gimin aro ua maikai Kristoo bebra·aniona re·bahachim uko manderangna agane on·skaaha. Nagma da·ode Jisu Kristoko pilakna bate bilakbatgipa ine aganrongaha. 

2.  ANIL KANT

Anil Kant saksa Punjabi Hindu nokdangoni ong·a. Uni ma·a paa Hindu toromo bilake bebra·gipa ong·e chonmitingonin Anil-na Hindu toromni segipa kattarangko agane on·rongaha. Torom-na namen gisiko nangbegipa nokdango dal·atako man·oba Anil-ni gisiko maikoba nangdapku·enga gita pangnan  uni gisiko chanchiani nabarongaha. Ua Music-na namen gisiko nangbegipa ong·achim aro ukon ua uni janggi tanganio mongsongbatgipa dake ra·na miksongaha.Uni jikgipaba namen Musicna gisiko nangbegipa ong·achim. Anil an·tangni kristian ripengrangna gitrangko tarie on·rongaha. Indake ua salsao Sastro Johon 14:6 ko poraigakaha. Uno indake agana, “Angan Rama, Bebe aro Janggi; angko re·jaode pilakba pagipaona sokja”. Ian Jisu Kristoni Uni a·gilsako dongmitingo an·tangni gimin rake sakki on·e agangipa katta ong·a. Ia kattarangan Anil-ni janggi tanganiko dingtangatna a·bachengaha. Ua walonin ua Jisuni agangipa Kattarangni gimin chanchibewalaha. Ua Jisuni agangipa Kattarangkon chong·mot ong·a ine nike an·tangni janggi tanganiko Unan pakwatsrangaha. Ka·sne ka·sne Anil-ni jikgipa Reena-ba uni segipani janggi tanganio dingtang ong·aniko nikaha. Ua setang Anil-ni gital Isolko ra·chakna man·jaha ; indiba Anil  uni jikgipako na·a da·alo siode nang·ni janggina mai ong·gen ? Ine uo sing·aha. Ua uni jikgipako ia sing·anina aganchakaniko Sastro-oniko sandichina aganaha. Jensalo uni jikgipa Reena Sastroko poraion Jisu Kristoni chisolo sichake uni pilak paprangko kema ka·ani gipin poraion ian chong·mot ong·chongmota ine bebera·e uaba Jisu Kristoko Jokatgipa Gitel ine ra·chakaha. Da·alo Anil, uni jikgipa Reena aro uamang nokgimikan Jisu Kristona dangdike on·enga aro dingtang dingtang mediarang gita Isolni Kattarangko gipinrangna agane on·skaenga.

India A.songo Kristianrangko

 A.rikanirang

                                                    

  Miss Munisha K. Marak,

                                                                                                    Tengabari.

1997 bilsionin Indiao kristianrangko a·rikanirang batrorobaenga ine an·ching dingtang dingtang songbadrangko poraiode nikna man·gen. Ka·mao mesok-atenggipara Indiani dingtang dingtang songbadrangoniko ra·chimonge batanggimin bilsirango kristianrangna ong·a obostarangko see rakkianiko  on·tisa  parakat-enga.1997 BILSIO ONGA  OBOSTARANG September 2, Bihar: Father Christudas-ko dokeming ramao nagande re·ataha.

 October 27, Bihar : Catholic Father A.T Thomasko so·otaha.

October 30, Gujarat: Silchidare ra·bitgipa manderang tribal kristianrangni nokrangko rue galaha. November, Rajastan : Parish-o donggipa manderangko chadraprongaha aro bilsi gittamni gisepo uamangni dongchakgipa biapko wate katchina kristianrangko ka·mikenataha.

November 22, Manipur : Father Jose Nedumattathil, Donbosco skulni principalko so·otaha.

December ’97 - January ’98,  Ahwa-Dang (Gujarat): Tribal kristianrangko changni chang  chadrapaha.

                                1998 BILSIO ONG·A OBOSTARANG

January, Maharasthra : Paul Nagendran aro uni dol Hingoli songona re·ange Bible tract-rangko aro Biblerangko suale on·on uamangko u·igijagipa manderang doke wataha. Uamang Paulni skoo biljimbee dokaha. Uamang uko shiv mitena rasong on·ani gitko ring·china  ge·etaha; indiba Paul uamangni agananiko jechake Jisunasa rasong on·e gitko ring·skaaha, unon uamang uko doke wataha. Uamangni indake biljime dokani gimin Paul da·ode re·na man·gija bang·a bilsirangna biapo tue dongaiaha.

January 6, Bihar : Father Vilian Topno-ko chadrape biljimbee doke wataha.

February, Haryana : Bilsi 200 ong·pilgipa gitchamgipa kristianrangni gopramko ra·sekaha aro Col. James Skinner-ni gopramko nosto ka·aha.

March 2, Gujarat : Vadodara Polo Groundo kristianrangni tom·bimonganio chonchongipa Sastroni kattarangko sualgipa manderangko chadrapaha. Ua chadrapanio uamang okgnanggipa me·chik saksako ka·saninggija uni oko changni chang ga·tinge wataha. Policerang chadrapgipa manderangko rim·ani pal chadrapako man·gipa kristianrangkosa rim·aha.

March 4, Gujarat: Vadodara Polo Ground-o Nama Kattako aganprakmiting somoio adita manderang re·bae golmal ka·aha aro ja·mano stageko wa·al so·e galaha.

April 11, Gujarat: Music team ‘Angelos’ ‘11’ ni programme ong·atgipa biapona adita sak manderang gol·dikrangko ra·bite re·bae bebera·giparangko ka·saninggija dake doke wataha aro tangka 50,000 mangni gamchatgipa doka-dam·ani bosturangko nosto ka·e galaha.

April 16, Gujarat : Ahmedabadni sepango donggipa Naroda-o sorkarini niam gita rikgipa gilja nokko rue galaha; indiba sambamangmango niam gri rikgipa mite nokkode mamingba dakajaha.

May 10, Maharasthra: Robibar salo olakkigipa giljarang Brethren Assembly, ge·gni Pentecostal gilja aro Jehovah witness giljarangona re·ange golmal ka·aha aro uamangko mikkangchi indake olakkitaijachinaba ka·mikkenataha.

June 17, Gujarat : St. Savariyar gilja, Mumbai songjinmani chel·ao donggipa gilja nokko nosto ka·aha; indiba niam gri rikgipa mite nokkode mamingba dakjaha.

June 21, Gujarat : Dangs districtni  Singana songo donggipa prayer hall-ko so·e galaha.

July 3, New Delhi : Delhio sason ka·gipa BJP sorkari olakkigipa biaprango churangko Gitelni meattamko dakmitingo jakkala ine matnangdrae giljanokrangko pe·e galna miksongenga ine kobor-rango parakaha.

July 17, Karnataka : Bangalore, Mysore, Mandya aro Mangalore-o ge ·11 kristianrangni chalaigipa skulrangko chadrape uamangni skul ka·anirangko dontongataha. Uamangni indake dakana agangipa sister saksako studapaha.

July 18, Gujarat : Suratni sepango donggipa kristian Missionaryrangni chalaigipa skul nokrangko rue galaha. Skul bi·sarangni kal·grikchakgipa bakrako tractorchi we·chichie nosto ka·aha.

July 18, Tamil Nadu : Anaipalayam-o donggipa Assembly of God (A.G) mondoliko chadrapaha aro gilja noko donggipa bosturangko ra·e kataha.

September 25, Madhya Pradesh: Jhabuani Christian Convento donggipa sister-rangko drae til·ekaha.

September 26, Uttar Pradesh : Udham Singh Nagar districtni Khatimani sepango donggipa Union church-ko ra·sekdrae ua gilja noko Siv miteko songe donskaaha.

September 30, New Delhi : Acharya Giriraj Kishore, VHP ni secretary general kristian missionaryrangko India a·songko wate re·angchina aganaha.

October 18, Maharasthra : Pethni sepango donggipa Sadapada songni kristianrangko chadrapaha aro gilja nokko nosto ka·e galaha.

November 4, Gujarat : Dangs districtni Baurigautha songo donggipa chapel nokko so·aha aro Nirgumandal songni gilja nokrangkoba nosto ka·aha.

November 9, Haryana : Jhajjar districtni Khera Khummar songni conventko pe·e galaha aro sakgni sister-rangko doke ua districtko wate re·angchina aganaha.

November 12, Gujarat :  Kamath songo donggipa gilja nokrangko so·aha.

December 14, Gujarat : Lachanchariya aro dingtang dingtang biapo donggipa gilja nokrangko so·e galaha.

December 24, Maharasthra: Krismas manigipa kristianrangko doke wataha aro Mumbai songjinmani Borivili biapo ong·atgipa tom·bimonganiko ong·atna on·gija champengaha.

December 25, Maharasthra: Mumbai songjinmaoni 100 km. mang chel·ao donggipa Kalyan Brethren Assembly mondolini bebera·giparangni Gospel tract sualgiparangko chadrapaha aro uamangoni sakbriko biljimbee doke wataha.

                                                1999 BILSIO ONG·A OBOSTARANG    

January 23, Gujarat : Surat districtni Songarh taluk biapo donggipa te·gni prayer hallrangko chadrape so·e galaha.

January 23, Orissa: Australia ni missionary Graham Staines aro uni depante sakgniko Manoharpur songo uamang paningsa sakgittamni tusichakgipa jeep gariko so·chipe so·otaha.

February 2, Kerala :  Indian Pentecostal churchni pamong sakgni aro uamangni songrechakgipa autorikshawko chalaitimgipako biljime doke wataha.

February 15, Tamil Nadu: Graham Staines-ni gopako video  mesokchakgipa gilja Ooty-ko chadrape nosto ka·aha.

March 27, Uttar Pradesh : Allahabado donggipa Christian Leprosy Home-ko ta·rake chipchina ka·mikkenataha

March 16, Orissa : Orissani Gajapati district-ni Ranalai songo songdonggipa kristianrangni dongchakgipa nok te. 150 mangko so·aha.

April 2, Maharasthra : Mumbaini Poisaro donggipa CNI mondolini good Friday gilja ka·miting somoio ro·ong goaha aro uno sak 7 bebera·giparang mata-bu·ako man·aha.

              

                Gisikni gita dakgrikani

                                                                                                       

                                                

                                                                                                         Elder Nanak R. Marak

                                                                                            A.G. Church, Keating Road, Shillong.

Sastro-o Isolo bi·aniko BILAKBEGIPA BIL ine Sastro-o parape·aha.  “Toromigipa mandeni dingchike bi·ani dal·-arangko dakna ama, ine Jakob 5:16-o agana. Indiba Isolo bi·anio indakpile bil donga ine  an·ching ma·sian ma·sichengjaenga. Bi·ani gita a·gilsako mamingchiba an·ching jingjengatna man·gipa bilko nikjawa. Ukon Isolni mande saksa agana “Isolo bi·aniara mandeni gisiko chanchiana bate mairongpile bilakbatgipa bil ong·a. Maina jensalo  bilgrigipa kristian mande bi·a unon uni dakna amani bilrang ritcha-rangona, hajalrangona soke namarangko dakna gita re·-ongkatanga. Bi·aniko karikna  amja, maina jensalo mande Isolo bi·on, Isol kam ka·a.” Jensalo gnigipa  a·gilsak gimikni dakgrikani ong·a unon America a·song bilakbegipa atom bomb-ko skanggipa changna Japan a·songni Tokyo songjinmao galaha. Iano sak 92,000mang manderangni jang-girang gimaatako man·aha. Indiba an·ching Sastro-oniko niatskabo, jensalo Assyria  a·songni man-derang Jerusalemko dakgrikna re·baon Hezekiah raja uni a·songni manderangni pal Isolo grape bi·aha, unon Isol un’ walo sagreko watataha aro sak 1,85,000 hajal  Assyriani sipairangni janggirang nisiatako man·skaha. Indakode Hezekiah rajani Isolo bi·o kam ka·aniara bilakgipa atom bomani nisigipa manderangnade changgni ong·pile bata! Isolo bi·anio bil dong-chongmota. Ia  bi·ani bilo bobilrangko  so·otna gita  chu·onga gita bil dongode, gimagipa janggirangko jokatnaba iano bil dongchongmotgen. Sastro-o bi·bo ine agananirang bangen donggenoba an·ching ukon dakan dakujaenga. Israelrangna bi·chakgipa mande dongjani gimin Isol an·tangan ja·gokpilaha(Isaia 59:16). Haida an·ching A·chikrangoba indaken ong·enggen? Ua an·chingoniko bi·gipa manderangko amenga.    Gimagipa janggirangna Isolo bi·aniara mingsa minggnio pangchake bi·emangmang uanon bonaija (a) Isol darangni gimaanikoba nikna sikja (2 Pit.3:9) aro Isol Jisuko a·gilsakni paprangna sichakna watataha (1 Johan2:2) ine Isolo bi·anio mang-mang dontonganiko nangnikjaenga indiba iano Diabolni rim·a man·giparangko uni jokoniko jokatna gisikni gita dal·a dakgrikanirangkoba dakgrikchina Isol nangnikenga. Uni gimin nangchong-motgipa Sastro-o iani gimin maidake janapa uarangko an·ching niatgen-chimode an·chingna bebeko u·ina gita namen dakchakani ong·gen.(a) Gima-gipa janggirang Saitani patok ningo donggiparang ong·a uamangko Saitan jakgitel watna sikja-enga (Isaia 14:17), (b) Gimagipa jang-girang Saitani sason ka·ani ningo aro uni songnokni sason ka·anichi uni nokkolrang ong·baha (Wat.26:18), (c) Diabolni de·drang (Johan 8:44), (d) Nama Kattana mikandalgiparang (2 Kor. 4:3-4), (e) Saitanko bilakatgiparang (Eph.2:2), (f)Saitani jagaoni jokna bilgri-giparang (1 Johan 5:19) aro (f) Bilakgipa mandeni nok (Mark 3:27). Ge·sa Sastroni bakoniko an·ching ra·e uko talatanirangko niode an·ching rongtale ma·sibatgen: Talate aganani Ephesus 2:2-o indake agana, “An·ching sakantiba  batang-gimin salrango ia  a·gilsakni gita re·rurachim, ia a·gilsakni bangbangni raja pamong jeon manigijaparangni dedrangrango da·o kam ka·enga.” ‘Work’ ingipa kattara Greek kattao energeo ba “bilko ra·bagipa” ine ong·a. Uni miksongani  gimagipa janggirang “Diabolni gisikchi bilakataniko” man·giparang ong·a.  Beben gima-enggipa mandede iakode u·ipajaenga aro ua an·tangko Saitani bilni ningo ineba ku·rachaktaijawa. Ua jakgitel ine an·tangko  nikenga indiba ua ia a·gilsakni raja pamongni jeko ge·eta aro  dakna didia ukosa ua dakenga. Hai an·ching 1Johan 5:19-ko niatna, “Aro an·ching ma·sia an·ching Isolni ong·a aro namgijagipa a·gilsak gimikko  tolpinapaha”. Iani miksongani a·gilsak gimik(jeon pilakan janggi tangenga) ua gimikni kosakon namgijagipa an·tangni bilchi ganggopaha. Angni chanchiani gita Sastro-o gimagipa janggirangko Kristo Jisuona rimbani gimin agangipade  Mark 3:27-o segipa kattan ong·a. Ia Sastroni bako Jisu an·tangan agana, “Bilakgipako ka·chengjaode, maikai uni nokona napbange uni pilak gnangrangko nisigen.” Iano aganani indake ong·a, gimagipa janggirang maming dakeba saniba dakchaka gri Saitani budi on·ani aro uni sason ka·ani ningoni jokna man·chongmotja. Ian an·chingni skanggipa jeko dakna nanga uko an·ching dakchengna nanggipa kam ong·a. Ia jakgitelani kamkoara gipin dingtang kamchi kam ka·ja ian Isolo bi·anichisa skanggipa kam ka·na man·gen. Janggirangna dakgrikani a·bao dakgrikani maikai chu·sokgen? (1) Skanggipa dakgrikanio a·bao dakgrikna je silchi dareko jakalna Isol on·aha uko  jakalna  jaktango ra·bo. Vietnamo dal·a dakgrikani ong·mitingo saksa sipai gnangchim ua maikai silchi darerangko jakkalna nanga uarangni gimin simsake skie ra·engachim. Isol an·chingnaba ia bilakgipa silchidareko gisikni gita dakgrikani a·bao jakkalna on·aha. “Be·en aro an·chichide an·chingni dak-grikani ong·ja, indiba killa-rangko Isolni bilchi pe·e galna ama”(2 Kor.10:4).Dakgrikani a·bako u·ijani giminsa an·ching a·bao dakgrikani silchidarekoba u·ijaenga. Dakgrikani aro silchi-darerangko jakalani gimin talate nang·na on·a skangba nang·ni chongmotgipa dakgrikanide Isolo bi·anian ong·a ine agantaina gita sikgen.Bi·achisa an·ching dakgrika. Saksa Sastro skigipa agana “pilak Isolo bi·anirang” pilakan dakgrikani ine ua aganronga. Indake jensalo an·ching Isolo bi·jaenga ong·ode, Saitan namgijachi dakgrikao an·chingko amangenga, indiba jensalo an·ching Isolo bi·enga, ua amako man·angenga maina  Isolo bi·aniko warachaknade uo maming silchidare dongskaja. Uni giminsa “Dondikgija bi·bo” ine Isol an·chingoniko amenga ( 1 Thess- 5:17). Watatarang an·tangtangko “jringjring Isolo bi·anio aro Isolni Kattako agananio” dongna ine aganaha (Wat.6:4). Jedake mandeni bilchi dakgrikanio  bilakgipa bomb, dakgrikani tank gari, missile, grenade, rifle, aro dingtang dingtang matsramgipa silchidarerangko jakkala gita gisikni biding gita dakgrikanioba silchidareko jakalanide pilakan mongsonggipa ong·aia. Hai indakode da·o an·ching  maikai bilakgipa silchidarerangko  Isolo bi·anio jakkalna nanga uarangko niatskanaha. (1) Jisuni An·chi: Ian skanggipa mongsonggipa an·chingni jakkalna nanggipa silchidare ong·a. Parape·a 12:11-o agana, “aro uamang uko Mes bi·sani an·chichi amaha….” Ibri 2:14-o Isolo bi·anio Jisuni an·chiko jakkalaniara namen bil gnanggipa ong·a: “Siachi Ua jeon siani  bil gnangchim, ua Diabolko nisina gita man·gen.” Strong Dictionary iakon  “kamna jakkalna choligipa; namgnini grigipa” ine an·chingna talataha. Jensalo Saitan dosi grigipa Isolni Depanteko chisolo so·oton, ua an·tangkosa so·ota gita dongaha. Unonisa ua an·tangko bilgrianiona ra·onaha. Adamni papo ga·akani somoioni je gita Isolni ge·etgimin niamrangko ua Adamko tolpinabe man·achim ua gimik bilrangba uoni re·angsrangaha. Maina Jisuni chisolo ua pilak segimin niamni saorangkoba dengalsrangaha. Da·ode ua Jisuni chisolo dakgipa kamni kosako bilkon man·srangjaha. Da·alo je kam-rangko  ua a·gilsakni manderango bil gnange ba bil man·e kam ka·enga uade mingsa mangmangsan uan uni tolpinapachi manderangko tolanisan ong·aiaha. Uni giminsa jensalo an·ching Jisuni an·chiko jakkala, an·ching Saitan aro uko jarikgipa sa·grerangko Jisuni chisolo amako man·giparang ine uamangko an·ching gisik ra·atenga. Ian janggirangna dakgrikanioba jakkalna nanggipa matsrambegipa Isolni silchidare ong·a.Jisu Kristoni chisolo papna manderangni nanggipa grorangko Jisu an·chitangko on·e groko chotaha (1 Johan 2:2) aro da·o Saitan janggirangna damko on·kuja inesan ua manderangni janggirangko rimgrope donenga maina an·ching manderangko jakgitelatna gita bilake niam gita dakgrikjaengani gimin ua cholko man·kuenga. (2) JISUNI BIMING: Gipin Silchidareara JISUNI  BIMINGAN ong·a. Jisuni sninggiparang Nama Kattako saki on·e re·bapilani ja·mano Giteltangna ku·si ong·e aganaha,  “Gitel, Diabol aro uni sa.grerang nang·ni bimingna bama” ( Luk 10:17). Da·alo Saitan an·chingnaba bama. Gisikni songnoko  Gitel Jisuni biming namen bilakbegipa biming ong·a ine  Sastro-o iani gimin  rokom 3 dake janapaha. (a) Skanggipa, ian  Jisu Kristo pilak dakgiminrangni Gitel ong·a. “Maina salgio aro a·ani kosako donggiparang, nikarang aro nikgijarang, singhasonrang ong·bo, gitel ong·anirang ong·bo, raja ong·anirang ong·bo, bilrang ong·bo pilakkon Uano dakaha; Uachin aro Uana pilakon dakaha” (Kol. 1:16).(b)    Aro gnigipao, Uko chisolo datkapanichi Ua Gitel ong·a.“Uni gimin dedrang an·chi aro be·enko bak man·pani gimin ua an·tangba ugitan apsanoniko bak man·pachim; maikai ua siachi siani  bil gnanggipako, chongmotan Diabolko, gimaatna amgen aro janggi tanga dipet siani kenanio nokol ita man·giparangko jokatokna amgen” (Ibri 2:14-15). (c)    Aro gitamgipao, Uko mukkut stikatanichi Ua pilakni Gitel ong·a: “Ua salgiona re·angenba  Isolni jakrao gnang; aro sagrerang aro bil gnanggiparang aro bilo donggiparang Una bamatako man·a” (1 Pitor 3:22). Gitel Jisu maiko ge·eta uko an·ching gimagipa janggirangna Isolo bi·anichi manigiparang ong·baa aro uamangko jakgitel watchina an·ching Diabol aro uko jarikgiparangni rim.e donaoniko watchina Jisuni bimingo dabieng-giparang. Ia dabianiko Saitan Jisuni bimingo manina gita nangaigen. (3) ISOLNI KATTA: Gipin aro bilakgipa silchidareara Isolni Kattan ong·a, uko an·ching Isolo bi·anichi jakalna  nanga.  Sastro-ni bakko janape bi·anio bang.a bi·terangko an·ching nikna man·gen.  Isolni kattakon “Gisikni Tonual” (Eph.6:17) ine minga.Saitani pilak bil aro sason ka·ani bilrangko Ua Skobikrok a·brio okprake galaha( Kol.2:15) (Ibri 2:14), da·-ode uo maming bilan dong-srangjaha, uo mingsa cholsan dongaiaha uan chalaki dake manderangko tol·ani. Indako-mangba, uko an·ching ga.sue nikuaienga, maina ua “a·gilsak gimiko tol·pinapna” bil gnangchim(Par.12:9). Indiba, an·ching jringjring Isolni Kattako Isolo bi·e dakgrikanio uko jakalode, an·ching pilak somoion uni kosako chegen aro janggirangni jakgitel ong·anikoba nikgen. (4) MITELANI: Mittelaniba Isolni an·chingna on·gipa ge·sa bilakgipa silchidare ong·a, uko an·ching Isolo bi·anio jakalna man·gen. Jensalo Isolko an·ching mitelna a·bachenga, Ua somoion Isol an·chingona re·baa (Git.22:3) aro an·ching mairongpile  “Sipairangni dal·batgipani”donganiko an·chingni janggirangna dakgrikanio nike namen katchagen. An·ching aiao inmangipa ong·a obostako Isolko mittelanio an·ching Sastro-o 2 Serikani Odhai 20-o nikna gita man·aha. Israel jatni bobilrang topgrime Israel a·songko chagropengachim. Obosta namen namjabegipa ong·engachim, unon  Judani raja Jehoshapat  Judahni pilak manderangko “Okgimu chake bi·china” okamaha. Indiba ian jensalo uamang Isolko ringna aro mittelna gita a·bachengosa Isol Ammon, Moab aro Seir a·brio donggipa mandeni dedrangrangni kosako jak de·skaha. Uamang Judahko nisina re·baha indiba uamang Isolni sipairangchi dokako man·skaha. An·chingoni bang·batarangan janggirangna bi·anio dakgrikanio maikai mittelaniko jakkalna nanga aro Isolko mittelon mai bil an·chingona re·baa uani gimin ma·sitokuja? (5) Okgimu chakani: Ia bilakgipa silchidare indiba iako banggijarangsan dakgrikanio jakalna changtokenga. Iakon “bilakbatsrangipa bil” ine minga indiba an·chingde uko galasa galatskaenga.  Angni ma·siani gita  Okgimu chake Isolo bi·aniara komibeoba changchikung biterangko ra·bana amgen. Isolni an·chingna dakgrikaniko ra·bani miksonganian bobilni kosako amaniko on·asa ong·a. Okgimu chake bi·aniko simsake jakkalanichi bobilni kosako sason ka·aniko ra·bana man·gen. Isaia 58:6-o maiko agana uko knatimbo: “Ian angni mikchagimin okumu chakani ong·jama? Chong-motan, denggu dakani ka·a-nirangko engara? Pakripeni budurangko enggruara? Aro onia dakako man·gipako jakgitel watatara aro pilak pakripeko peara?.”  Salsao Jisuni sninggiparang saksa koreni gisiko man·gipa mandeko uoniko rikgalna man·jani gimin sing·anirang nakataha. Unon Jisu uamangna aganaha, “Okumu chake bi·anichi agre mamungchiba indakgipa ong·katja” (Mark 9:29). (6) KA·SAA: Gisikni songnoko dakgrikanio bobilni kosako amna gita Ka·saan bilakgipa silchidare ge·sa ong·a. Je mandean gisik ka·tong gimikchi Isolna ka·saa ua mande maming saloba gimagipa janggirangna ka·sagija dakjawa, ua an·tangna gitan an·tang songsulna ka·sagen. Parape·a 12:11-o agana, “Aro uamang siaona kingkingba an·tangtangni janggitangtangnaba ka·sajaha. Jensalo na·a sanaba ka·saa, na·a uni norokona re·angaoniko jokatna jegitaba kingkot rake kam ka·gen. Chongmotko agansrangode, ka·sao maiba chu·sokgijani dongama?  Ka·sako indake agana,“Na·a sanaba ka·saode,pilakon chaka, pilakkon bebe ra·a, pilakon ka·donga, pilakon chakchika. Ka·sao chu·sokgija mamingan gri” ( 1 Kor.13:7-8) Indake jensalo an·ching Isolni silchidarerangko jakkale an·ching jensalo Isolo bi·a unon mai ong·a? 2 Kor 10:4-5 indake agana: “Maina chingni dakgrikani silchidare be·enoni ong·ja, indiba killarangko pe·e galna Isolni mikkango bilaka; chinga chanchiarangko aro Isolko u·ianina an·tangko dedogipa pilak chu·gipa killarangko pe·gala aro Kristoko manichina  pilak mangsongarangko bamata.”  (7) Bebe ra·gijani: Da·o an·ching ma·sia Isol an·chingko bi·anio jakkalna sika aro bi·anichi an·ching Diabolni rikgipa killarangko pe·e galna bil gnang. Hai an·ching da·o maikai joka man·kugijagipa manderangko Diabolni killarangchi chipchange rakienga uarangko niangskana. Pilakna bate bilakbatgipa killade bebe ra·gijanian ong·aia. Bebe ra·gipaoba bebe ra·gijagipaoba mongsonggipa dal·gipa killade iana agre dong·jaha. Uni giminsa kristian bebe ra·giparang Isolni bebegipa kattako u·iatanichi gimagipa janggirangko bebe ra·aniona rimbana rake kam ka·a jedakode ua mande bebe ra·e Isolni songnoko bite gnanggipa janggi tanganiko tangna gita man·gen. Indiba bebe ra·gijagipa mandeni killara  Jisuko u·igijani aro uko bebe ra·gijanian ong·a. Maina bebe ra·gijani papsan nang·ko noroko gale matnanganiko on·a gita man·aigen. Satan Jisuni jokataniko namgni gri ine manderangna tol·achi mikandalatna joton ka·a. Unode joka man·kugijagipa mande Isolni kosako aro Uni kattani kosako chadengna gita a·bachenga. Jensalo man·e cha·gipa pante Jisuona re·baon ua maikai jringjrotni janggiko man·a ama ine sing·aha. Jisu maikai jokna nanga uani giminde una aganjaha. Batesa uni mal gamrangko kangalrangna suale on·china uko ge·etaha. Indiba man·e chagipa pante uko dakna gita jechakaha aro ua jedake gimaani bimango re·baa indaken ua re·angpilaha. Jisu ia mandeni ka·tong aro gisiko mik-bokachi sason ka·a man·aniko namedaken ma·siachim. Ian uko joka man·aoniko champengenga aro ua ka·tong be·ja ong·ode, Nama Kattade maming saloba ia mandeo bite nanggipa ong·na man·jawa ine u·iachim (Mark 10).

Bible Quiz

                                                                                                             

                                                                                                           Pa.G  S. Sangma

 

   Ka·mao on·gipa kattarang Bibleni ong·ama ong·ja aganchakbo. Uarangna aganchakengon, Bible ba Bible ong·ja ia minggnini gisepo mingsako basee tik ong·gipa aganchakanina kosako right chinko on·bo. Ka·mao on·gipa aganchakanirangko nina skang na·a baditana an·tango Isolni Kattarang bilakachim uko nina dakbo. Pilak aganchakanirangko dakmano ka·mao on·gipa aganchakanirangko nie, aganchakani tik ong·gipana on·gimin mark-ko on·e chandime nibo. Chu·gimik mark 100 aro tik ong·gipa mingsa aganchakanina mark 4.

             Full Marks :  4 x 25  = 100.

1. Bang·a gamna bate bimung namgipako, Aro rupa aro sonana bate ka·saaniko sean nambata.

                            1. Bible-ni Katta  2. Bible-ni Katta ong·ja

2. Papko mitchibo, pappina ka·sabo.

                            1. Bible-ni Katta  2. Bible-ni Katta ong·ja

3. Bi·sarangni cha·aniko ra·e achakrangna galna namja.

                            1. Bible-ni Katta  2. Bible-ni Katta ong·ja

4. Bebeara a·aoni naa ; Aro kakket dakani salgioni nionchoka.

                            1. Bible-ni Katta 2. Bible-ni Katta ong·ja

5. Cheksio manggni ma·bakgipa do·ona bate jako mangsa donggipa do·oan gamchatbata.

                            1. Bible-ni Katta  2. Bible-ni Katta ong·ja

6. Na·a salgichi re·angna skang norok-ko napake re·angna nanggen.

                            1. Bible-ni Katta  2. Bible-ni Katta ong·ja

7. Angan Alpha aro Omega, dongenggipa aro dongmangipa …

                            1. Bible-ni Katta 2. Bible-ni Katta ong·ja

8. O Gitel, jean angna janggiko on·aha, angna mitelani ka·tongkoba on·bo.

                            1. Bible-ni Katta 2. Bible-ni Katta ong·ja

9. Mikkangchi dongsogipa jang·kirangko niksojaoba, bebera·anian skanggipa ja·ku ga·ani ong·a.

                            1. Bible-ni Katta  2. Bible-ni Katta ong·ja

10. Katchaaniara nang·o maiba dongani gimin ong·ja ; indiba nang·ni giminsa ong·a.

                            1. Bible-ni Katta 2. Bible-ni Katta ong·ja

11. Jokatgipa do·oko na·a rim·na man·tainaba donga ; indiba ku·sikoni jokgimin kattako na·a re·bapilatna man·ja.  

                            1. Bible-ni Katta 2.Bible-ni Katta ong·ja

12. Sakanti mande knana bakbakgipa, aganna ka·singipa, ka·onangna ka·singipa ong·china.

                            1. Bible-ni Katta 2. Bible-ni Katta ong·ja

13. Seng·na skang pangnan andalchenga.

                            1. Bible-ni Katta 2. Bibleni Katta ong·ja

14. Salo sal nang·ko dokjawa, Aro walo jajongba.

                            1. Bible-ni Katta 2. Bible-ni Katta ong·ja

15. Mitchiani mitchianiko chel·atna amja ; indiba ka·saa mangmangsa.

                            1. Bible-ni Katta 2. Bibleni Katta ong·ja                                                   

16. Gamchatgipa tona bate namgipa bimungan nambata.

                            1. Bible-ni Katta 2. Bible-ni Katta ong·ja

17. Angni gaora dakani angni rasongo ga·akgen.

                            1. Bible-ni Katta  2. Bible-ni Katta ong·ja

18. O mande, ua nang·na namako mesokaha, aro kakket daka, ka·sachakaniko namnika aro nang·ni Isol baksa onao re·ruraana agre …

                            1. Bible-ni Katta  2. Bible-ni Katta ong·ja

19. Sakgipinna ka·saaode Isolni mikkangko nikgen.

                            1. Bible-ni Katta  2. Bible-ni Katta ong·ja

20. An·tangni betsmitko salrikgipa an·tangni depanteko mitchia ; Indiba una ka·sagipa nanga gita uko doke skia.         

                                  1. Bible-ni Katta 2. Bible-ni Katta ong·ja

21. Mingsni dal·gipa paprangni gisepo ka·onanganian namjabatgipa pap ong·a.

                                   1. Bible-ni Katta 2. Bible-ni Katta ong·ja

22. … na·simango donggipa a·gilsako donggipana bate dal·bata.

                                   1. Bible-ni Katta 2. Bible-ni Katta ong·ja

23. Isol aro Sastro gri a·songko name sason ka·na man·ja.

                                   1. Bible-ni Katta2. Bible-ni Katta ong·ja

24. Ka·saa grigipa a·gilsako nokdangan salgi ong·a.

                                   1. Bible-ni Katta 2. Bible-ni Katta ong·ja

25. Anga tuaha aro tusiaha ; Anga mikrakaha ; maina Jihova angko chel·chaka.

                                   1. Bible-ni Katta 2. Bible-ni Katta ong·ja

                                           A G A N C H A K A N I

1). Bible-ni Katta>Toe skiani 22:1                             2). Bible-ni Katta ong·ja>Mahatma Gandhi

3).  Bible-ni Katta>Mati 15:26                                  4). Bible-ni Katta>Gitrang 85:11

5). Bible-ni Katta ong·ja>English aganme·apa       6). Bible-ni Katta ong·ja>Steve Miller Bond     

7). Bible-ni Katta>Parapea 1:8                                       8). Bible-ni Katta ong·ja>William Shakespeare

9). Bible-ni Katta ong·ja>Martin Luther King Jr.10). Bible-ni Katta ong·ja>Iako segipani biming                      dongja

11).Bible-ni Katta ong·ja>Jihudi aganme·apa         12). Bible-ni Katta>Jacob 1:19

13).Bible-ni Katta ong·ja>Thomas Fulle                   14). Bible-ni Katta>Gitrang 121:6

15). Bible-ni  Katta ong·ja>Martin Luther King Jr 16). Bible-ni Katta>Aganprakgipa 7:1

17). Bible-ni Katta ong·ja>William Shakespeare    18). Bible-ni Katta>Mika 6:8          

19). Bible-ni Katta ong·ja>Herbert Kretzmer          20).  Bible-ni Katta>Toe Skianirang 13:24

21). Bible-ni Katta ong·ja>Fredrick Buechner         22). Bible-ni Katta>I Johon 4:4

23). Bible-ni Katta ong·ja> George Washington       24). Bible-ni Katta ong·ja>Christopher Lasch

25). Bible-ni Katta>Gitrang 3:5

Pa Christerson Sangma aro Ma Jesiana

M. Marakni   Sakkirang:

Kan·dike chingni nokdangni sakirangko on·atna kusi ong·bea. Angni jikgipa Jadok ba jasnirangna uni  oko saanirangko man·ahachim. Iandake salsao doctor-rangchi check-up ka·na re·angon sonograp ka·na aganaha .  Sonograp ka·giminko doctorna mesokon nang mande-ni oko gull stone donga ine  parakaha. Anga namen tangka paisarangni gita adita jajrengbeani ong·aha. Indiba anga Tanggipa Isolni mairongpilgipa bilakaniko gisik ra·e   Una agane bi·aha, “ Nibo, Gitela angni jikgipako operation ka·na gita hajal sotbongmang nangenga, angni jako tangkarang dongpaja. Unigimin na·an nambatgipa Doctor aro sagiparangko an·sengatna man·gipa ong·a ine anga bebera·e nango bi·a, na·an angni jikgipako an·sengatsrangbo” ine anga bi·aha. Anga Isolni ong·atgimin be·en-ni bakko ratna kusi ong·jaengachim. Angni jikgipao indake sing·aha, ‘Na·a Isolni ong·atgimin be·enko ratna kusi ong·ama ong·ja? Unon ua aganchakaha, Ihing, angade kusi ong·ja. Unon anga angni jikgipana aganaha indide Isolni to nonga mangimin mandeko okamate nang·na bi·chakatna. Angni jikgipaba bi·chakako man·a kusi ong·beaha. Unon salgipino Bro. Juda Momin chingni nokona re·bae angni jikgipana bi·chakangaha.Ua sa·dikanirangko agantaijaha. Indake chinga doctorchi sonograp ka·taie nina re·angtaiaha. Unon doctor jagok man·e sing·aha, nang·ni operation ka·na nanggipa sabisiara bachijok! ine singaha. Unon anga aganchakaha, Isolni mande re·bae angni jikgipana bi·chakaha. Isol uko an·sengataha. Indake sakki on·a ska  Isol Tanggipa Isol ong·a. Angni nokdangoniko tangka bon·gnioniko  aro sabisi man·e janggi tangaoniko Kristo Jisu an·sengatsrangaha, Amen